Osy maman 2015 jylǵy 28 jeltoqsanda «Qaıratpen» úsh jyldyq kelisimshartqa otyryp, komanda Qazaqstannyń Sýperkýbogyn jeńip alǵanda basy-qasynda bolǵan. Quramy myqty Almaty klýby bul kýbokqa onsyz da ıelik etýi múmkin edi. Al jańa maýsymdaǵy «Qaırattyń» súreńsiz oıyndary (4 matchta 2 utylys, 2 teń oıyn) Reseı mamanynyń ketýine túrtki boldy.
Biz Qazaqstan fýtbol federasııasynyń basshylary sekildi Borodıýktiń keremet jaǵyn bilmeıtin shyǵarmyz. Mamandar ony beker shaqyryp otyrmaǵan da bolar, biraq óz elinde kópten beri sanatta joq maman ózge eldiń namysyn janyp, iri jeńisterge jeteleıdi degenge kúdigim bar. Álem chempıonatynyń irikteý synynda ol baptaıtyn Qazaqstan quramasynyń Armenııadan 2:0 esebimen jeńilýi osynyń dáleli ispetti.
Qazaqtyń namysyn shaıbaly hokkeıden Qurlyqtyq hokkeı lıgasynda qorǵap júrgen «Barys» degen jalǵyz komanda bar. О́zindik oıyn órnegi qalyptasqan minezdi komanda. Dál qazir bul ujymnyń basyna kim kelse de atalǵan lıganyń bel ortasynan tómen túse qoımaıtyndaı múmkindikke ıe. Elorda komandasy qazir QHL-diń Shyǵys konferensııasynda óner kórsetip júr. Keshe ǵana Gagarın kýbogy jolyndaǵy jarystyń ekinshi satysynda Magnıtogorskiniń «Metallýrgine» qaýqar kórsete almaı, tórt kezdesýde qatarynan utylyp, pleı-off jarysynan shyǵyp qaldy.
«Barysty» ár kezde A-P.Selın, V.Krıkýnov, A.Nazarov syndy mamandar basqardy. Fınn mamany basqarǵan tusta astanalyq hokkeıshiler gol soǵý, jeńis sany boıynsha lıgadaǵy barlyq rekord ataýlyǵa ózgeris engizip úlgerse, V.Krıkýnovtyń basshylyǵymen týrnır kestesinde 11-orynǵa shyǵyp, «eń úzdik sheteldik komanda» ataldy.
Nazarovtyń úlken erligi sol – komandada Jaılaýovpen qatar basqa qazaq jastarynyń da attary atala bastady. Ybyraıbekov, Ryspaev... Qaıyrov ta komandaǵa shaqyryldy. Orystar «qazaq batyry» dep atap, ár oıynda seskenip júretin Damır Ryspaev – Nazarovtyń tól ónimi. Orys hokkeıinde qazaqtan qorqý sezimin uıalatqan Nazarov myrzaǵa osy úshin de alǵys aıtýǵa bolady. Sál erkeletip alǵan shyǵarmyz Damırdi, biraq onyń qazaqtyq minezine, namysqa toly jigerine búkil QHL tánti boldy.
О́tken jyly komandaǵa belarýs mamany Edýard Zankoves keldi. Nege keldi, qandaı jetistikke jetkizem dep keldi, ol jaǵy Qazaqstan Hokkeı federasııasynyń basshylyǵyna ǵana málim. «Barystyń» quramynda legıoner kóp. Ulttyq quramanyń bazalyq komandasy sanalatyn «Barysta» oınatyp alyp, halyqaralyq syndarǵa salatyn qazaqtyń soılary qaıda? Utsa da, utylsa da jergilikti hokkeıshilerdi nege oınatpaımyz? Pleı-off kezinde jersindirilgen amerıkalyq sańlaqtardy oınattyq úzdiksiz. Biz súıenip otyrǵan osy azamattar erteńgi álem chempıonatynda úzdigip qalmaı ma? О́z qaqpashylarymyzdy (V.Kolesnık, P.Polýektov) demaldyryp qoıyp, búginde teńdessiz sheteldik myqty Karlssondy qoıdyq qaqpaǵa. Qazaq hokkeıiniń bolashaǵy dep júrgen Álıhan Ásetov, Nursultan Belgibaev, Mádııar Ybraıbekov sekildi arystandarymyzdy «Barystyń» quramynda shıratyp almaǵanda, sheberligin qaıda tolystyramyz? Muny oılaý úshin bapker taktık bolýy kerek, aldaǵy 5-6 jyldy kórip turýy tıis.
Zankovestiń sońǵy bapkerlik qyzmeti – Reseı birinshiliginde óner kórsetetin «Avangard» HK bas bapkeriniń kómekshisi. О́tken jyldyń naýryzynda bul laýazymnan bosap qalǵan «mamandy» «attaı qalap» shaqyryp aldyq.
Jalpy, biz maman tańdaýda qandaı ólshemderge súıenemiz? Oıynshy retinde kórsetken sheberligine me, álde bapker retinde qol jetkizgen nátıjelerine me? Bul eki kórsetkishte de Zankoves atap aıtatyndaı deńgeıde emes.
Bálkim, Borodıýk pen Zankovestiń baǵyn Qazaqstan ashatyn shyǵar, biraq olardyń baǵyn bizdiń ashýymyz emes, bizdiń baǵymyzdy tańdap alǵan talantty bapkerlerdiń ashqany áldeqaıda durys.
Erteń ǵaıyptan taıyp, ekeýi de ketip jatsa syrttan taǵy kimdi shaqyrar ekenbiz?..
Dúráli DÚISEBAI,
jýrnalıst
