Aımaq basshysyna pedagogtardyń birinshi synypqa arnalǵan jańa júıedegi jumysy kórsetildi. Eń basty problema – qaǵaz jetispeýshiligi. Muǵalimder baqylaý men ózindik jumystardy oqýshylarǵa ózderi shyǵaryp beredi. Bir toqsanda qaǵaz alýǵa orta eseppen 15 myń teńge qajet. Al bıýdjette oǵan tıisti qarjy qarastyrylmaǵan. Pedagogtar qaǵazdy óz aqshasyna alýǵa nemese ata-analardan kómek suraýǵa májbúr. Ata-analardyń «muǵalimder qıt etse aqsha jınaıdy» deýiniń mánisi osynda jatqan syńaıly.
– Bilim basqarmasynyń basshysy retinde siz osyny durys dep sanaısyz ba? – dedi oblys ákimi Ashat Aımaǵambetovke. – Bul memlekettik mekeme emes pe, muǵalimderdiń eńbekaqysy tómen, onyń ústine jeke shyǵyndalady. Bul máseleni sheshýdi tapsyramyn.
Eńbek kabınetiniń stanoktary men oqý quraldary tozǵan. 2013 jyly birneshe jańa verstak pen bir stanok alynypty. Qalǵan jabdyqtar jańartylmaǵan. Jalpy, oblysta 245 mektepte «Tehnologııa» páni boıynsha jabdyqtardy jańartý qajet ekeni anyqtaldy. О́ńir basshysy jańa jabdyqtardy satyp alý máselesin sheshýge ýáde berdi. Mekteptiń ashanasyndaǵy problema – eskirgen jáne jartylaı jumys istemeıtin jabdyqtar jaıy. Negizi mektep janyndaǵy ashanalardyń bári jalǵa beriledi. Zań boıynsha jalǵa alýshylarmen kelisim bir jylǵa jasalady. Sondyqtan jabdyqtardy aýystyrýǵa qomaqty qarjy jumsaý olar úshin tıimsiz.
– Biz zańnamaǵa ashanalardy memleket-jeke menshik áriptestigi negizine aýystyrý jáne jalǵa alýshylarmen kelisimdi bes jylǵa deıin bekitý týraly ózgerister engizýdi usynbaqpyz, – dedi Bilim basqarmasynyń basshysy A.Aımaǵambetov.
Oblys basshysy bul bastamany qoldady. Budan basqa, sport zaly men tóbesinen sý aǵyp turǵan kabınetterdi aralady. Muǵalimder men ata-analar synyptardy jóndeýge qajet aqshany óz qaltalarynan tóleýge májbúr ekendikterin aıtty. Bıýdjet qarjysy ǵımaratty kútip-ustaýǵa ǵana jumsalady. Kúrdeli jóndeý jumystary 27 jyldan beri júrgizilmegen. Keıbir synyptar jabyq. Shırek ǵasyrda shıraq qımyl jasamaǵan mektep kináli me, álde...
Oblys ákimi ǵımaratta kúrdeli jóndeý jumystaryn qolǵa alýdy tapsyrdy. Bul úshin 174 mln teńge qajet. E.Qoshanov problemalardy bıýdjettiń múmkindigin eskere otyryp, kezeń-kezeńimen sheshýge ýáde berdi.
Mıras Asan,
«Egemen Qazaqstan»
Qaraǵandy
