Sýret: gov.kz
Eger shot jeke maqsatqa ashylsa, ol «kúndelikti ómirge arnalǵan» degen sanatqa kiredi. Iаǵnı jalaqy alý, zeınetaqy túsýi, kommýnaldyq tólemder jasaý, dúkende saýda jasaý sııaqty turmystyq isterge ǵana qoldanylady. Bul shot arqyly bıznes júrgizýge, tabys tabýǵa nemese kásibı qyzmetten aqsha qabyldaýǵa bolmaıdy. Ulttyq bank osylaısha jeke adamnyń aqshasy men jumys arqyly tabylatyn kiristi shatastyrmaı, eki bólek ustaýdy kózdep otyr. Bank te, klıent te shottyń qandaı maqsatta ashylǵanyn aldyn ala bilip otyrady. Eger adam bankke jeke tulǵa retinde shot ashsa, ol shot arqyly kásipkerlik nemese kásibı qyzmet júrgizilmeıdi dep jazbasha túrde rastaýǵa tıis. Sondaı-aq bul shot ózin-ózi jumyspen qamtyǵandarǵa arnalǵan arnaıy salyq rejiminde de paıdalanylmaıtyny kórsetiledi. Munyń bári Ulttyq banktiń 2025 jylǵy 31 jeltoqsanda qabyldanǵan №111 qaýlysyna engizilgen.
Endi «Qarapaıym debet kartamen ne isteýge bolmaıdy?» degen suraq týyndaıdy. Jańa erejege sáıkes, eger bankpen bólek kelisim jasalmasa, jeke shot arqyly kásipkerlik qyzmet júrgizýge, ózin ózi jumyspen qamtyǵan retinde tabys tabýǵa, notarıýs nemese advokat retinde jumys isteýge, atqarýshylyq qujattar boıynsha tólem qabyldaýǵa, medıasııa arqyly daý sheshýge, basqa da kásibı qyzmet túrlerine tyıym salynady.
Ulttyq bank bul ózgeristi «qıyndatý» emes, aqsha qozǵalysyn retke keltirý maqsatynda engizip otyrmyz deıdi. Keıingi jyldary kóptegen azamat bızneske qatysty tólemderdi jeke shot arqyly júrgizgen. Bul baqylaýdy qıyndatady ári salyq salýda túsinbeýshilik týǵyzady. Erejeni buzǵandarǵa jaýapkershilik bolýy múmkin, biraq naqty qandaı jaza qoldanylatyny ázirge aıtylǵan joq.
Kóp adamdy mazalaıtyn taǵy bir suraq: buryn ashylǵan shottarǵa ne bolady? Bul talap tek 2026 jylǵy 11 qańtardan keıin ashylatyn jańa shottarǵa qatysty. Burynnan bar shottardy jappaı qaıta rásimdeý mindeti joq. Degenmen bank shottaǵy operasııalar kásipkerlikke uqsap ketse, onyń maqsatyn naqtylap suraýy múmkin.
