Depýtattar bastamashy bolǵan «Qazaqstan Respýblıkasynyń keıbir zańnamalyq aktilerine kreatıvti ındýstrııalardy qoldaý jáne damytý máseleleri boıynsha ózgerister men tolyqtyrýlar engizý týraly» zań ulttyq mádenıet salasyn zaman talaptaryna saı jańǵyrtýdy kózdeıdi. Otyrysta atalyp ótkendeı, zańdy maquldaý mádenıet salasynyń básekege qabilettiligin arttyrýǵa, sondaı-aq ulttyq mádenı qundylyqtardy saqtaý men ilgeriletýge yqpal etedi.
«Qaralǵan zań elimizdegi kreatıvti ındýstrııa salasyn retteıtin zańnamany odan ári jetildirýdi kózdeıdi. Atap aıtqanda, salany qoldaýǵa baǵyttalǵan birqatar jańa tetikter engizilip otyr. Sonymen qatar ókiletti organnyń quzyretteri naqtylanyp, qosymsha mindetter júkteldi. Jalpy, zań elimizdiń kreatıvti ekonomıka sektorynyń odan ári damýyna tyń serpin beredi dep senemiz», dedi M.Áshimbaev.
Zań aıasynda kınematografııa máseleleri men jastar saıasatyn retteıtin salalyq zańdarǵa da qatysty ózgerister engizildi. Maquldanǵan zań biryńǵaı saıasat sheńberinde kreatıvti ındýstrııalardy damytýǵa, shyǵarmashylyq áleýetti ekonomıkanyń bir bóligine aınaldyrýǵa, mádenı jáne kreatıvti ónimderdiń sapasy men maǵynalyq tolyqtyǵyn arttyrýǵa múmkindik beredi.
Bul rette jastardy shyǵarmashylyq qyzmetke tartýǵa járdemdesý, olardyń osy saladaǵy bastamalary men jobalaryn qoldaý jónindegi normalar týraly sóz bolyp otyrǵanyn atap ótken jón.
