«Kıeli Mańǵystaý jerinde sizdermen kezdeskenime qýanyshtymyn. Qazir elimizde úlken ózgerister bolyp jatyr. Dúnıejúzinde bolyp jatqan jaǵdaılardy ózderińiz kórip, bilip otyrsyzdar. Myna jaqta terrorızm, Reseıdegi jaǵdaıdy da estip otyrsyzdar. Eki ımperııanyń ortasynda ornalasqan elmiz. Barlyǵynyń bizge yqpaly bolady. Biz syrtqa shyǵaryp satatyn munaı-gazdyń baǵasy quldyrap ketti. Bıýdjetke túsetin qarajat 40 paıyzǵa azaıdy. Sonyń barlyǵyna qaramaı, tik turyp ósip kele jatqan Qazaqstan degen elimiz bar», - dedi Prezıdent.
Nursultan Nazarbaev memleketimizdiń úsh birdeı uly daǵdarystan aman qalǵanyn atap ótti. «Birinshisi, Keńes odaǵy kúıregen kez. Ne isterimizdi bilmeı, bul qazaq el bola ma, bolmaı ma dep eldiń bári aıtqan kez. Ekinshi, Shyǵys Azııada bolǵan daǵdarys. Úshinshisi - 2007-2009 jyldardaǵy dúnıejúzilik jahandyq daǵdarys. Sonyń bárin eskere kelip, byltyr 25 jylda jetken jetistikterimizdi dúnıejúzine pash ettik. Osy jyldardyń ishinde elimiz qýatty memleketke aınaldy. Álemdik kartada joq Qazaqstandy shegelep turyp qoıdyq, dárejesin kóterdik. Búkil Dúnıejúzi syılaıtyn, qurmetteıtin el boldyq. Onyń naqty belgisi – BUU Qaýipsizdik keńesiniń músheligine saılanýymyz», - dedi Elbasy.
Arnur Asqar,
«Egemen Qazaqstan»
