"Reseı Federasııasy Tergeý komıtetiniń naqtylanǵan málimetterine súıene otyryp, osyǵan deıin iz-tússiz joǵalyp ketti dep sanalǵan Qazaqstan azamaty Maksım Aryshevtyń 2017 jyldyń 3 sáýirinde Sankt-Peterbýrgte bolǵan teraktiniń saldarynan qaza tapqanyn habarlaımyz. Bul barlyǵymyz úshin qaıǵyly jaǵdaı", - dep habarlady QR SIM ókilderi.
Qazirgi ýaqytta Maksım Aryshevtyń denesi Sankt-Peterbýrgtegi Ekaterınınsk qalalyq aýrýhanasynda. Ata-anasy ony tanydy.
QR SIM ókilderi men Sankt-Peterbýrgtegi qazaqstandyq dıplomattar Maksım Aryshevtyń týystaryna barynsha kómek kórsetedi, sondaı-aq, olar qaza tapqan stýdenttiń denesin otanyna jetkizý máselesine de kómek beredi.
"Maksımnyń týystary men jaqyndaryna jáne osyndaı adamgershilikke jatpaıtyn qylmystyń qurbandary bolǵandardyń otbasyna kóńil aıtamyz", - delingen QR SIM habarlamasynda.
Aıta keteıik, búginde qaza bolǵandardyń sany 14-ke jetti, 11 adam oqıǵa ornynda qaza tapty, al úsheýi aýrýhanada qaıtys boldy. Qazirgi ýaqytta 49 adam aýrýhanada jatyr.
