Qazaqstan azamattary, onyń ishinde salyq tóleýshiler 2017 jyldan bastap kólik salyǵy, jer jáne múlik salyǵynyń esepteýleri týraly aqparatty salyq organynyń saıtynan bile alady.
Sonymen qatar salyq týraly aqparat kommýnaldyq qyzmet tóleminiń túbirtegine de jazylady, tipti elektrondy pochta arqyly nemese SMS-habarlama arqyly alýǵa da bolady.
Munymen qosa, jeke tulǵalardyń kólik, múlik jáne jer salyǵyndaǵy qaryzy jaıly habarlamanyń jańa túri engizilip jatyr. Al qalypty málimettermen qatar, qaryzdy tóleýge múmkindik beretin banktik rekvızıtter týraly aqparattar qosa joldanady.
Salyq tóleýshilerge aqparat «Azamattarǵa arnalǵan úkimet» memlekettik korporasııasy arqyly pochtamen 10 jumys kúninde jetkiziledi, sondaı-aq elektrondy úkimettiń veb-portalyndaǵy salyq tóleýshiniń jeke kabınetine joladanady. Poshta arqyly ári elektrondy kabınetke joldanatyn habarlamada qaryz, eseptelgen salyq somasy, salyq esebin ótkizbeý men tekserý júrgizýdiń qorytyndysy jaıly málimetter beriledi.
Jeke kásipkerlikti tirkeý
Bıylǵy jyldan bastap jeke kásipkerlikti tirkeý habarlaý tártibine kóshirildi. Jeke kásipkerlikti qaıta tirkeý de osy tártippen júrgiziledi. Tirkeý málimetteri ózgertilgennen keıin 10 jumys kúniniń ishinde habarlamany memlekettik kirister organdary men «Azamattarǵa arnalǵan úkimet» memlekettik korporasııasyna joldaý kerek. Al salyq organdary qaıta tirkeýdi bir jumys kúni ishinde júrgizýge mindetti.
Salyqtyq tekserý boıynsha
Buryndary salyqtyq tekserý júrgizilgende ınspektor kýágerlerdi tartpaýǵa quqyǵy bolǵan, al 2017 jyldan bastap kýágerlerdi de tartýǵa mindetti. Munymen qosa, salyqtyq tekserý júrgizý úshin taǵy bir negizdeme engizildi – salyq tóleýshiniń salyq organdary bekitken tártipti buzǵany týraly habarlamany oryndamaǵanyn rastaý qajet.
Qosymsha qun salyǵyn tóleýshilerge qatysty
Eger QQS tóleýshi ornalasqan ornynda bolmaǵan jaǵdaıda túsiniktemege onyń ornyn rastaıtyn qujattardyń notarıýspen bekitilgen kóshirmesi qosa beriledi. Habarlamany tapsyrys hatymen nemese elektrondy pochtamen joldaýǵa bolady.
Salyqtyń artyq tólengen somasyn qaıtarý
Budan bylaı salyqtyń artyq tólengen somasyn qaıtarý kezinde salyq organdary hronometrajdy tekserý júrgizbeıdi. Patent arqyly qyzmet atqaratyn salyq tóleýshiler qoldaný kezeńinde patenttiń óz baǵasy tómen bolsa, somany azaıtyp, qosymsha esep ótkizýge jáne artyq tólengen salyqty qaıtarýǵa ótinish jazýǵa quqyǵy bar. Buryndary artyq tólengen soma hronometrajdy tekserý júrgizilgennen keıin ǵana qaıtarylyp kelgen. Salyq tóleýshilerge yńǵaıly bolý úshin bul tártip ózgertildi.
Jer salyǵy men múlik salyǵy boıynsha
Jer salyǵy men múlik salyǵy boıynsha merzim bir jylǵa uzartyldy. Salyq organdary jeke tulǵalar úshin esepteýdi esepti kezeńnen keıingi jyldyń 1 shildesinen keshiktirmeı júrgizedi. Tıisinshe, jeke tulǵalar bıýdjetke salyq tólemin eseptik kezeńnen keıingi jyldyń 1 qazanynan keshiktirmeı tóleýi kerek. Osylaısha, salyqty tóleýge, esepteýge bir jyldaı ýaqyt bar.
Al ortaq menshiktegi múlikti tirkeý kezinde ótinishte salyq tóleýge jaýapty tulǵanyń esimin kórsetý kerek.
2018 jyly jeke tulǵanyń múlik salyǵyn baǵalaý bastalady. Bul 2017 jyldan bastalatyn mindettemelerge qatysty, sondyqtan 2018 jyly salyq organdary baǵalaýdy júrgizýleri kerek.
Esepke qoıý jáne esepten shyǵarý
Salyq salý nysandary men salyq salýmen baılanysty nysandardyń ornalasqan orny boıynsha esepke qoıý jáne esepten shyǵarý joıyldy. Bul jeke tulǵalarǵa da qatysty – qurylysy aıaqtalmaǵan nysandar jeke tulǵalardyń salyq salynatyn nysandarynan shyǵarylady.
Munymen qosa, 2017 jyly QQS tóleý boıynsha esepke qoıý tártibinde keıbir ózgerister oryn aldy. Budan bylaı notarıýspen bekitilgen qujattardy berýdiń qajeti joq.
Eger salyq tóleýshi ótinish berý kezinde salyq esebin berýdi toqtatqan dep sanalsa, salyq organy QQS boıynsha erikti esepke qoıýdan bas tarta alady.
Salyq organdary salyq tóleýshini habarlamastan, sot sheshiminiń kúshine enýin negizge ala otyryp, QQS boıynsha esepten shyǵarýdy bir jaqty tártipte júzege asyrady.
Birinen soń biri bolǵan salyqtyq kezeń kezinde ótkizý, satyp alý boıynsha málimet kórinbegen jaǵdaıdaǵy QQS boıynsha esepten shyǵarýǵa qatysty norma joıyldy.
Aksızdelgen taýardyń jekelegen qyzmet túrin atqaratyn salyq tóleýshi retinde esepke qoıý habarlandyratyn tártipke aýystyrylady. Habarlama mundaı qyzmetti iske asyrýǵa deıin 3 jumys kúninen keshiktirilmeı beriledi.
Osy jyldyń shilde aıynan bastap salyqtyq tekserý aktisin aldyn ala jasaý tájirıbesi engiziledi. Tekserý men sońǵy aktini aıaqtaǵanǵa deıin salyq organynyń mamany tekseriletin salyq tóleýshiniń qolyna aldyn ala aktini berý kerek. Salyq tóleýshi kórip, qarsylyǵy bolsa, jazbasha túrde berýge quqyly.
Shilde aıynan bastap QR Qarjy mınıstrliginiń janynan salyq tóleýshilerdiń tekserý nátıjesine salyq tóleýshiler túsirgen shaǵymdardy qaraıtyn apellıasııalyq komıssııa jumysyn bastaıdy.
