Ras, álemdik qaýymdastyq aldynda halyqaralyq masshtabtaǵy batyl jobalarymen, balamasyz usynystarymen tanyla bastaǵan elimiz úshin bul kórme zor múmkindikterdi iske asyryp, múddelerdi aıqyndap alar tamasha alańqaı bolǵaly tur. Osy turǵydan alǵanda, qaı salada bolsyn jan-jaqty qarmanyp, upaıymyzdy túgendeı bilgenimiz abzal. Sportymyzdyń da bul maqsatqa qosar úlesi súbeli degen oıdamyz.
Qazirgi tańda Qazaqstandy halyqaralyq sport arenasynda zor senimge ıe bolǵan, sporttyq derjavalardyń qatarynan oıyp oryn alǵan memleket dep nyq senimmen aıtýǵa bolady. Buǵan mysaldy alystan izdep keregi de joq. Kúni keshegi XXVIII Dúnıejúzilik qysqy Ýnıversıadanyń joǵary deńgeıde ótýiniń ózi elimizdiń álemdik sport qaýymdastyǵy artqan senimge qanshalyqty adal bolǵanyn kórsetse kerek.
Mine, sporty osynsha órlep turǵan Qazaqstan «Astana EKSPO-2017» kórmesi kezinde óziniń áleýetin taǵy bir márte pash etýge zor múmkindik aldy. Iаǵnı, alystan kelgen meımandar kórmeni ǵana qyzyqtap qoımaı, alýan túrli sporttyq jarystardy da tamashalaı alady.
Iá, bıylǵy jaz Astana dúbirli jarystardyń ordasyna aınalǵaly tur. Elordamyzda atalǵan álemdik forým aıasynda 12 birdeı iri týrnır ótedi eken. Eń aldymen, 22-28 maýsym aralyǵynda «Dáýlet» sport kesheninde kórkem gımnastıkadan Azııa chempıonaty tý tigedi. Sary qurlyqtyń sulýlary arasyndaǵy bul báseke aıaqtala salysymen karate-shınkıokýshınkaı sheberleri álem chempıonatynyń júldeleri úshin tartysqa túspekshi. Jarys 28 maýsymda bastalyp, 4 shilde kúni aıaqtalady. Ile-shala, ıaǵnı 10-17 shilde aralyǵynda karate-do shıto-rıý dep atalatyn sport túrinen Azııa chempıonaty jalaý kóteredi. Budan keıin, 15-24 shildede tennısten Prezıdent kýbogy jolyndaǵy týrnır ótedi. Al 20-24 shilde aralyǵynda ótetin belbeý kúresi boıynsha álem chempıonaty kim-kimdi bolsyn qyzyqtyrary sózsiz. Mine, qarap tursańyz, maýsym, shilde aılarynda elordada sporttyq sharalardyń qara qazany burq-sarq qaınap jatady eken!
Astanaǵa myń-mıllıondap keletin qonaqtardyń aldynda Qazaq eliniń tól sporty – qazaq kúresin taǵy bir qyrynan tanystyrýdyń múmkindigi týyp tur. Jarnamasy kelisse, tamyz aıynyń 3-6 kúnderi «Barys Arena» sport kesheninde ótetin qazaq kúresinen «Álem barysy» týrnırine kelýshilerdiń az bolmasy anyq. Álemniń ár túpkirinen kelgen balýandar qazaq kúresi dodasynyń kórigin qyzdyryp jatqan tusta «Eldorado» atys alańynda stendtik atýdan álem chempıonaty shymyldyq túredi. Týrnır 3 tamyzdan bastalyp, 13 tamyz kúni aıaqtalady dep josparlanǵan.
Qazaqtyń qandaı jaýynger halyq ekenin pash etetin sporttyq sharanyń biri – «Qazanat» atshabarynda ótetin kókpardan álem chempıonaty dep oılaımyz. Bul dodany tamashalaǵan sheteldik meımandar kórgen qyzyq, alǵan áserden kópke deıin aıyǵa almasy sózsiz.
Tórtkúl dúnıege maqtan eter taǵy bir tamashamyz – toǵyzqumalaq sporty. Qyrkúıek aıynyń 2-9 kúnderi «Hotel ibis Astana» qonaq úıinde sporttyń osy túrinen álem chempıonatynyń jalaýy jelbireıdi.
Mine, «Astana EKSPO-2017» kórmesi Qazaq eli sportynyń qaryshtap damyǵanyn ǵana emes, memleketimizdiń halyqaralyq deńgeıdegi mańyzy zor jarystardy ótkizýge qanshalyqty qaýqarly ekenin, ıaǵnı álemdik sport qaýymdastyǵynyń senimine ábden kirgen áriptes ekendigin tórtkúl dúnıege taǵy bir márte dáleldemek. Budan bólek, balamaly energııa kózderine ıek artqan elimiz halqynyń salamatty ómir saltyn ustanatyn ult retinde tanylýy da álem aldyndaǵy abyroı-bedelimizdi ósire túseri sózsiz.
