Ádettegideı Abaı alańynan aqtaryla tógilgen sazdy mýzyka halyqtyń kóńil qoshyn odan beter kóterip jiberdi. Dostyq pen Abaı dańǵyldaranyń buryshyndaǵy Respýblıka saraıynyń aldy – Halyq birliginiń merekesin atap ótý úshin tekten-tek tańdalmasa kerek. Almatydaǵy barlyq etnomádenı birlestik búgin osynda bas qosyp, arnaıy otaý tikti. Ulyq mereke dál osy jerden bastaý aldy. Alyp Abaı eskertkishiniń túbinde bizge bergen suhbatynda Qazaqstan halqy Assambleıasynyń múshesi, «Ahyska» túrik etnomádenı birlestiginiń jetekshisi, fılosofııa ǵylymdarynyń doktory, professor Qazaqbaı Qasımov aǵamyz bylaı dedi:
«Baıqaısyz ba, bıylǵy Halyq birliginiń merekesi Elbasymyz Nursultan Nazarbaevtyń «Egemen Qazaqstanda» jarııalanǵan «Bolashaqqa baǵdar: rýhanı jańǵyrý» baǵdarlamalyq maqalasymen tuspa-tus keldi. Maqalada aldaǵy ýaqytta da qazaqstandyq qundylyqtardy nyǵaıtý men ulttyq ıdeologııany jetildire berýge, jalpy ulttyq birlikti nyǵaıtatyn qazaqstandyq patrıotızmge aıryqsha mán berildi. Jyldar jyljyǵan saıyn túrlene túsip, jańa nyshanda ótetin mynaý – bir týdyń astyndaǵy ulttar dostyǵynyń merekesi, mine, sol talaptarǵa naǵyz jaýap qoı dep bilemin».
Almatynyń barlyǵy segiz aýdanynda bir mezette bastalǵan Halyqtar birliginiń merekesi alyp shahardyń bar buryshyn dýmandatyp jiberdi. Dombyranyń únine uıǵyr doırasynyń, koreı daýylpazynyń, ázerbaıjan sybyzǵysynyń úni qosylyp kók kúmbezge erekshe saz áýeledi. Qazaqstannyń asa tanymal óner sheberleri men estrada juldyzdary sahna sánin keltirdi. «Shańyraqtaǵy» merekelik kross, «Familý» saıabaǵyndaǵy ult taǵamdarynyń baıqaýy, «Mega Almatydaǵy» balalar úıinde tárbıelenýshilerdiń konserti, «Mega Parktegi» ár ult ónerpazdarynyń saıysy Halyqtar birligi merekesine erekshe shyraı berdi. Juldyzdar jamyraǵanda Almatynyń ústine ár tustan otshashý tógildi.
Talǵat SÚIINBAI,
«Egemen Qazaqstan»
Sýretti túsirgen: Nurmanbet QIZATULY
