Boıyńyzdy shymyrlatar shyǵarmalar, jaýyngerler rýhyn asqaqtatatyn ásem-sazdy áýender, temirdeı tártipke tárbıeleıtin tálimdi jattyǵýlar sharanyń shyraıyn keltirdi. Arnaıy konserttik baǵdarlamada elimizdiń eńbek sińirgen qaıratkerleri Elmıra Baqqalı, Murat Nurǵazıev, Estaı Muqashev, Edil Qusaıynov, sondaı-aq Ǵaını Jumasheva, Ashat Taýshev, Baýyrjan Turǵymbaev, Marjan Arapbaeva syndy kóptegen baıqaýlardyń laýreattary óner kórsetti. Ulttyq ulan ansambliniń folklorlyq toby, vokaldyq ujymy jıylǵandardy ásem sazǵa bólep óz ónerlerin ortaǵa saldy. Konsertke Ulttyq ulan Án-bı ansambliniń basshysy Darhan Rahymǵalıev kórkemdik jetekshilik jasady.
Shara barysynda kesh qonaqtary Ulttyq ulannyń fototilshisi Vıacheslav Gelbıngtiń ujymnyń qyzmettik-jaýyngerlik tynys-tirshiligi jaıly fotokórmesin tamashalady. Osy rette bir aıta keterligi, egemen elimizdiń Otan qorǵaýshylarynyń fotoshejiresin jasaýda Vıacheslav Gelbıngtiń sińirgen eńbegi aýyz toltyryp aıtarlyqtaı. Onyń kópshilik fotosýretteri kesh qonaqtarynyń kóńilinen shyqty. Qazirgi tańda maıtalman mamannyń jeke muraǵatynda áskerı salaǵa qatysty bir mıllıonnan asa fotosýret jıylǵan.
– Jaýyngerlik rýh tazalyq pen joǵary mádenıetten, izgilikpen ónerden bastaý alady. Sondyqtan, búgingi sharanyń mán mańyzy zor. Bul mádenı is-shara Qazaqstan Respýblıkasy Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» atty elimizdiń rýhanı jańǵyrýynyń biregeı baǵdarlamasy aıasynda uıymdastyryldy, – deıdi Qazaqstan Respýblıkasy Ulttyq ulanynyń bas qolbasshysy, general-leıtenant Rýslan Jaqsylyqov.
Arman OKTIаBR,
«Egemen Qazaqstan»
ALMATY
