Kooperatıvke birikkender paıdaǵa shyqty

Kóktem qashanda qaýyrt eńbekke toly. Bıyl óńirde 907,1 myń gektar alqapqa dán sebý josparlansa, dıqan-mehanızatorlar qımyly shıraq. Jáne súdiger kóterý, qopsytý, kókónis, qyzylsha egý jumystary da qarqyn alǵan. Árıne, osy qat-qabat tirliktiń qaıtarymdy bolýy tehnıka kúshiniń jetkiliktiligimen ólshenetini zańdylyq. Endi másele tolyq sheshimin tabatyn boldy. Budan bylaı óńirdegi aýyl sharýashylyǵymen aınaly­sa­tyn qojalyqtarǵa servıstik ortalyq óz qyzmetin usynady. Atalǵan sala tehnıkalyq ja­ǵy­nan jaqsy jaraqtan­dy­ryl­ǵan qýatty kásiporyndarmen birlesip, elimizdegi azyq-túlik qaýipsizdigin qamtamasyz etý jáne aýylsharýashylyq ónim­de­rin óndirýdi molaıtý, eks­port­tyq áleýetti qalyptas­ty­rý men negizgi azyq-túlik ba­ǵa­synyń ósýine jol bermeý tá­riz­di máselelerdi jolǵa qoıady, qadaǵalaıdy. Elbasynyń Qazaqstan hal­qy­na arnaǵan Joldaýyndaǵy tapsyrmalardy júzege asyrý maqsatymen «Jetisý» áleýmet­tik-kásipkerlik korporasııa­sy­nyń kómegimen jańa uıym­das­qan «Jarkent», «AgroFýd» jáne «Kóksý» ortalyqtary ju­mystaryn júıeledi. Memleketten tehnıka alý men qyzmet kór­setýge ǵana bıýdjetten 680 mln. teńge bólinipti. Jobanyń negizgi maqsaty usaq sharýa qoja­lyqtarynyń basyn biriktirip, irilendirý. О́ıtkeni, «Jumyla kó­ter­gen júk jeńil», dep beker aı­tylmaǵan. Panfılov aýdanynda egin egýmen aınalysatyn 100-ge jýyq usaq qojalyq birigip, iri aýylsharýashylyq kooperatıvin qurdy. Nátıjesinde 12 jańa tehnıka aldy. Jarkenttikter negizinen júgeri ósirýmen aınaly­sa­tyny belgili. Birigýdiń utar tusy – janar-jaǵar maıdan tarshylyq kórmeıdi. Egistiktiń qunarlyly­ǵyn arttyrýǵa da tıimdi. Eń bastysy, endi tehnıka jetkilikti. Sharýalardyń 3-5 gektar egistik jeri bar. Onymen sharýalar esh ýaqytta keń kósilip, tushym­dy tirshilik keshe almaıdy. Biz uzaq jylǵy maqsatymyzǵa jettik. Mine, kóktemgi dala jumys­ta­ryna jańa tehnıkalardy ke­ńi­nen paıdalanýdamyz, dedi sharýa qojalyǵynyń tóraıymy Tur­synaı Jantaǵulova. Servıstik daıyndaý orta­lyq­tary da osy maqsatta qurylǵan. Oblystaǵy usaq sharýashylyq­tar­ǵa qyzmet kórsetedi. Qap­sha­ǵaıdaǵy «AgroFýd» seriktestigi de sý jańa traktor, soqa, dán sepkish, jer jyrtqysh, taǵy basqa egistikke qajetti 20 tehnıkaǵa ıe boldy. «AgroFýd» seriktestiginiń dı­rek­tory Ońlan О́teýlinov áńgi­me­sinde ortalyq jerdi óńdeýden bastap, dán egýge, kútýge, shabýǵa, ónimdi satýǵa da kómektesemiz. Osy maq­satpen tehnıka alyp otyrmyz, dedi. Úsh ortalyq Belorýssııa men Re­seıdiń ozyq 121 aýylsha­rýa­shy­lyq tehnıkasyn satyp alǵan. Bul sharýalarǵa 10 jylǵa lızıngke berilgenin aıtqan jón. «Jetisý» áleýmettik-kásipkerlik korporasııasy bankter sııaqty tehnıka qunyna ósim qos­paı­dy. Alǵashqy úsh jyl jeńil­dik­pen, 7 jyl boıy birtindep tóleıdi. Odan ári quny ótelgen tehnıkalar sharýalar menshigine aýysady. Jobanyń ekinshi kezeńinde «Agro­Fýd» servıstik daıyn­daý ortalyǵynda syıymdyly­ǵy 6 myń tonnalyq kókónis saq­taıtyn qoıma salýdy jos­parlaǵan. Ol iske qosylǵannan keıin sharýalar ónim­derin sa­pa­syn joǵaltpaıtyn zamanaýı qoımada saqtaıtyn bo­lady. Qýatty «KamAZdar» men ónim­diligi joǵary «Belarýs» trak­torlary, astyq jınaıtyn kombaındar men shóp tyrma­lap, taılaıtyn, maıa salatyn, so­qalar men tuqymsepkishterdi, olarǵa tehnıkalyq qyzmet kórsetetin jyljymaly keshenderdi qaz-qatar qoıǵanda jer tósin emgenderge degen qamqorlyq birden kózge túsedi. Arnaıy stendilerde memlekettik baǵdarlamanyń maqsattary men mindetteri, jańa qyzmet kórsetý ortalyqtarynyń damý bolashaǵy, tipti búgingi kúni beriletin tehnıkanyń sany men jalpy quny kórsetilipti. Máli­met­terge súıensek, qapshaǵaılyq­tar ǵana jalpy quny 121 mln. 299 myń teńge bolatyn 26 tehnı­kany egistik alqaptaryna attan­dyryp úlgergen. Egin sharýashylyǵy qyzmet­kerlerine sonymen birge ofıs bólmelerin, máshıne aýlalaryn, qoımalar men qosalqy bólshek­ter men janarmaı saqtaıtyn oryn­dardy, qyrmandardy tómen baǵada jalǵa alý qyzmetteri usynylǵan. Keıin ósirilgen ónimdi qabyldap, tazalaý men keptirý, saqtap, qaıta óńdeýden ótkizýmen aınalysatyn keshender qurylatyny da jaqsy istiń jalǵasy deýge bolady. Jetisýdyń topyraǵy qunarly dala tósi dúbirge bólenip, jańa tehnıkalar molshylyq negizin qalaýǵa kiristi. Dıhan qaýy­my­nyń erteńge degen senimderi nyq. Kúmisjan BAIJAN. Almaty oblysy.