Aıbyn

San ǵasyrlyq tarıhynda qazaq halqy óziniń qaýip­sizdigi men aýmaqtyq tutastyǵyn, ana tili men dilin jáne basqa da qundylyqtaryn saqtap qalý úshin qı­ly kezeńdi bastan keshirdi. Attary ańyzǵa aınalǵan kóshpeliler – saqtar, ǵundar men kók túrkilerdiń ur­pa­ǵy retinde biz basty baılyǵymyz – qazirgi Qazaq­stan­nyń ulan-baıtaq dalasyna murager boldyq. Bizdiń dańqty babalarymyz – uly handar men batyrlar tereń aqyl, bıik namys, erjúrektik arqasynda el men jerdiń táýelsizdigi úshin kúresti. Búginde, óz tarıhymyzǵa kóz salyp, oı ekshegen biz – Tonykók, Kúltegin, Bilge qaǵan sekildi kóregen bıleýshi, uly qolbasshylardyń qadirin túsine bastadyq. «Túrki halqym úshin túnde uıyq­ta­ma­dym, kúndiz otyrmadym», dep Kúltegin babamyz aıtqandaı, olardyń tas eskertkishterge qashap jazyp qaldyrǵan sózderi túrki halqynyń talaıly taǵdyry men táýelsizdik úshin kúresin urpaqtar sanasyna máńgige bekitti. Halyq múddesin basty murat etý úrdisin sarabdal handar – Qazaq handyǵynyń negizin salýshy Kereı men Jánibek, Qasym, Haqnazar, Esim, Táýke, Ábilqaıyr men Abylaı jalǵady. Olardyń bas­taýy­men bizdiń elimiz azýly kórshileriniń toq­taýsyz qysymyna qaramastan, tarıh qoınaýynda joǵalyp ketpeı, ózin saqtaı bildi. Altaı men Aty­raý arasyna keńinen jazylǵan Qazaq­stan jeri basqynshy jaýlardyń sha­býy­lynan az zardap shekken joq. Sonaý ejelgi zamanda-aq ata-babamyz «Jaý joq deme, jar astynda, bóri joq deme, bórik astynda» dep beker aıtpaǵan edi. Osyndaıda Jalańtós Aıtqululy, Qarasaı Altynaıuly, Aǵyntaı, Qojabergen Tolybaıuly, Eset Kókiuly, Bógenbaı Aqshauly, Qabanbaı Qojaǵululy, Hangeldi Sy­rymbetuly, Sańyryq Toqtybaıuly, О́tegen О́teǵululy, Qoıgeldi Sart­uly, Raıymbek Túkeuly, Naýryzbaı Qut­tym­betuly, Oljabaı Toly­baı­uly, Baıan Qasabolatuly, Janataı Aqanuly, Jaýǵash Qyrbasuly jáne taǵy bas­qa­lary týǵan el men jerdi esepsiz jaýdan erlikpen qorǵady. Olardyń hal­qy­na degen adaldyǵy, erligi men batyr­lyǵy bizdiń sana­myz­da máńgilikke saqtalyp qaldy. Halqymyzdyń táýelsizdikke, aýmaq­tyq tutastyqqa degen san ǵasyrlyq ar­many bizdiń zamanymyzda, ótken ǵasyrdyń 90-jyldarynda ǵana oryndaldy. Keńes Odaǵynyń qu­ramyn­da ótken 70 jyldyq ómirinen keıin Qazaqstan egemendigin aldy, óz ekonomıkasy, jer resýrstary, tili men mádenıeti bar, halyqaralyq qatynastar salasynda ózindik saıasatyn júrgize alatyn táýelsiz memleketke aınaldy. 1991 jylǵy 16 jeltoqsanda Qazaqstan táýel­sizdigin jarııalap, jańa tarıhyn bastaıtynyn álemge pash etti. Respýblıka halqynyń – qazaq jáne basqa da ulttardyń zamanǵa saı jan-jaqty damýyna múmkindik týdy. Osy rette alda turǵan basty maqsat – egemendi memleket qurý, azamattyq qoǵam ınstıtýtyn túzý bolatyn. Sonymen qatar bolashaq baǵdaryn aıqyndap alý úshin táýelsizdiktiń alǵashqy qadamdaryn saralap alý qajet boldy. Munyń bárin is júzine asyrý úshin biz Qazaqstan Respýblıkasynyń Tuńǵysh Prezıdenti, keıinnen shynaıy ult Kóshbasshysy retinde ta­nylǵan tulǵa – Nursultan Ábishuly Nazarbaevtyń bastaýymen alǵa umtyldyq. Halyq oǵan óz taǵdyryn, óz bolashaǵy men urpaqtar bolashaǵyn senip tapsyrdy. Nursultan Ábishuly eldiń damýy men gúldenýine teńdessiz kúsh saldy. Táýelsizdik alǵannan bergi jıyrma jyl ishinde Qazaqstan saıasat pen ekonomıkada aýqymdy jetistikterge jetip, álemniń iri derjavalary pikirine qulaq asyp, usynysyn maquldaıtyn bedeldi memleketke aınaldy. Árıne, búgingi gúldengen Qazaqstan, damyǵan memleket – barlyq saladaǵy kóp jylǵy eren eńbektiń nátıjesi. Jıyrma jylǵy táýelsizdik belesterine kóz salsaq, Memleket basshysynyń, el aǵalarynyń, otandastarymyzdyń ortaq úlesi arqa­synda basty degen qundylyqtarymyzdy aıqyn­dap, zańdyq negizde bekitip alǵanymyzdy kóremiz. Áskerı salanyń mamany retinde biz solardyń mańyzdy degenderine keńinen toqtalyp, bir saralap ótýdi jón kórdik. Táýelsizdik tańy atqaly barshamyzdy mazalap júrgen másele – memlekettik shekarany mejelep, el shebin aıqyndaý bolatyn. Elbasymyz bul ba­ǵyttaǵy ister týraly: «Jer máselesi, ulttyń ómir súrý keńistigi men syrtqy shekarany qorǵaý bizdiń babalarymyz úshin qaı ýaqytta da eń mańyzdy másele bolyp kelgen. Mine, biz de táýelsizdiktiń alǵashqy jyldarynan bastap osy máselelerdi sheshýdi basty murat ettik», – degen edi. Birinshi kezekte, biz Qytaı Halyq Respýblı­ka­symen shekara syzyǵyn aıqyndap, ekijaqty kelisim jasadyq. Buǵan deıin patshalyq Reseı de, Ke­ńes Odaǵy da Qytaımen shekara máselesin túbe­geıli sheshe almaǵan bolatyn. 1994 jyly eki el ara­synda Memlekettik shekara týraly kelisimge qol qoıylyp, keńestik jyldary eki áleýetti qar­sylastyń arasyn bólip turǵan 1700 shaqyrym jerge qatysty qarym-qatynastar zańdyq turǵydan resimdeldi. Reseı Federasııasymen shekarany belgileý de ońaı sharýa emes edi. Memleket basshysynyń ta­ban­dylyǵy men danalyǵynyń arqasynda soltústik kórshimen shekaralas aýmaq halyqaralyq qarym-qatynasqa esh zalalsyz saqtalyp qaldy. 2005 jyly eki el arasynda memlekettik shekarany mejeleý týraly tarıhı kelisimge qol qoıyldy. Uzyn­dyǵy 7591 shaqyrymǵa sozylatyn bul shekara – Qazaqstannyń syrtqy shekarasy ishindegi, sondaı-aq, álemdegi qurlyqtyq shekaralar ishindegi eń uzyny ekeni belgili. Memlekettik shekaraǵa qatysty máselelerdi retteý jáne bizdiń eki iri kórshimizben tıisti kelisimderge qol qoıylýy – ejelden qońsy qonǵan, seriktes bolǵan elder arasyn buzýǵa baǵyttalǵan bar­lyq túsinispeýshilik pen arandatýshylyqqa toqtaý saldy. Osyndaı salmaqty da mańyzdy kelissózder ońtústikte – О́zbekstan, Qyrǵyzstan jáne Túrki­men­stanmen júrgizildi. Bul isterimiz de ońdy aıaq­ta­lyp, memlekettik shekara máselesi tolyǵymen sheshildi. Nátıjesinde, Qazaqstan Respýblıkasy óziniń alyp jeriniń tórt qubylasyn túgendep, 14,5 myń shaqyrymdyq shekarasyn mejelep aldy. Osy­laı­sha, memlekettiń aýmaǵy endi qaıtyp esh kúdik týǵyz­baıtyn deńgeıde tolyq belgilenip, ekijaqty qujattarmen resimdeldi. Bul mańyzdy saladaǵy jumys nátıjesi týraly Memleket basshysy 2005 jylǵy 29 qyrkúıekte Dúnıejúzi qazaqtarynyń III quryltaıynda bylaı dep qorytqan edi: «Jer aýmaǵyn belgilep alǵanymyz – Táýelsizdik jyl­dary qolymyz jetken jetistikterdiń eń bastysy. Bul týraly biz zamandastarymyz aldynda da, bolashaq urpaq aldynda da maqtana aıtýǵa quqylymyz». Táýelsiz Qazaqstandy álemge tanytqan alǵashqy oń bastamasy – ǵalamshardaǵy tynyshtyq pen qaýipsizdik jolynda iri ıadrolyq áleýetten bas tartýy boldy. N.Á.Nazarbaev bastaǵan táýelsiz Qazaqstan ıadrolyq qarýsyz derjava dárejesin tańdady, qaterli qarýdy kezeń-kezeńmen elden ákettirip, túbegeıli qutyldy. Iаdrolyq qarýdy taratpaý týraly kelisim-shartqa qosyldyq, TMD memleketteri ishinde alǵashqy bolyp Strategııalyq shabýyldaý boıynsha qarýlanýdy azaıtý týraly kelisimdi qabyldadyq. El Prezıdenti Birikken Ulttar Uıymy Bas Assambleıasynyń 62-sessııasynda sóılegen sózinde álemniń ıadrolyq derjavalaryn atomdyq arsena­ly­nan bas tartqan Qazaqstannan úlgi alýǵa shaqyrdy. Qazaq eli basshysynyń bul usynysy beıbitshilikti jaqtaýshy uıymdardyń, álemdik qaýymdastyqtyń yrzalyǵyn týǵyzdy. Qazirgi kúni Qazaqstan úlgisimen Latyn Amerıkasy, Afrıka, Ortalyq jáne Ońtústik-Shyǵys Azııada ıadrolyq qarýsyz aımaqtar quryldy. Elbasymyzdyń usynysymen Birikken Ulttar Uıymy 29 tamyzdy – Jappaı qyryp-joıý qarýy­men búkilálemdik kúres kúni dep bekitti. 1991 jyly osy kúni Qazaqstan basshysy óziniń Jar­lyǵymen álemdegi eń iri ıadrolyq polıgondy japqan bolatyn. Qazaq eliniń ıadrosyz álem isine qosqan úlesi týraly ótken jylǵy sáýirde Vashıngtonda ótken jahandyq sammıtte kóp aıtyldy. Mártebeli tul­ǵalardyń barlyǵy bizdiń Elbasymyzdy ıadrolyq qarýsyzdaný isinde úlgi bolatyn tuǵyrly tulǵa dep baǵalady. Sammıt sońynda memlekettik basqarý, qaýipsiz álem qurý jolyndaǵy orasan zor eńbegi úshin bizdiń Prezıdentimiz Beıbitshilik jáne aldyn alý dıplomatııasy syılyǵyna ıe bolǵanda tóbemiz kókke jetkendeı boldy. Búgingi tańda eldiń turaqty qaýipsizdigin saqtaý bir ǵana memlekettik shekarany bútindeýmen, Qarýly Kúshterdi kúsheıtýmen shektelmeıtini belgili. Sondyqtan aımaqtaǵy kórshiles eldermen tatý-tátti dostyq qarym-qatynasqa qol jetkizý úlken jumys bolsa, ony odan ári damytyp saqtaý asa mańyzdy másele. Sol mańyzdy máselelerdiń biri – aımaqtyq kórshilermen qaýipsizdikti birlesip saqtaý, ıaǵnı ujymdyq qaýipsizdik bolyp tabylady. Táýelsiz jıyrma jyl ishinde Qazaqstan aımaq­aralyq jáne jahandyq kıkiljińderge qarsy birigýdi jaqtap, ujymdyq qaýipsizdikti belsendi qol­daý­shy retinde tanyldy. Osy baǵyttaǵy bedeldi ha­lyqaralyq uıymdarǵa, máselen, Ujymdyq qaýip­sizdik týraly shart uıymyna, Azııadaǵy ózara is-qımyl jáne senim sharalary jónindegi keńeske, Shanhaı yntymaqtastyq uıymyna múshe bolyp úl­gerdi. Aımaqtyq qaýipsizdik uıymdarynyń quramy­­na kiretin iri eýrazııalyq memleket retinde Qazaqstan qaýipsizdikti jáne ózara senim jaǵdaıyn nyǵaıtý jolyndaǵy izdenisterin jalǵastyryp keledi. 2010 jyly Qazaqstannyń tózimdilik pen plıýralızmge negizdelgen ustamdy, salıqaly saıasaty­nyń jarqyn jemisi bolǵan mańyzdy tarıhı oqıǵa oryn aldy. Bizdiń elimiz Eýropadaǵy qaýipsizdik jáne yntymaqtastyq uıymyna tóraǵa boldy. Bul qurmetti de óte jaýapty mıssııany atqarý ústinde Qazaqstan aımaqtaǵy qaýipsizdikti nyǵaıtyp, uıymǵa múshe elder arasyndaǵy dıalog aýqymyn keńeıtti, uıymnyń ishindegi daǵdarystan shyǵýǵa jańa serpin berip, jumysyn jańa beleske kóterdi. Qazaqstan EQYU-ǵa tóraǵalyǵy kezinde sozyl­maly qaqtyǵystardy retteý, terrorızmmen kúres jáne shydamdylyqqa tárbıeleý, sonymen qatar, Aýǵanstandy qalpyna keltirýdi iske asyrý sekildi mańyzdy máselelerdi sheshýge kúsh saldy, Qyrǵyzstandaǵy jaǵdaıdy retteýge úlesin qosty. Elimiz tóraǵalyǵynyń qoıý núktesi ótken jylǵy 1-2 jeltoqsanda Astana qalasynda jınal­ǵan EQYU-ǵa múshe memleketter basshylarynyń Sammıti boldy. Bul basqosý jahandyq qarym-qatynasty, memleketter arasyndaǵy senim men ózara turaqtylyqty jańa satyǵa kóterdi. Táýelsizdik alǵannan bergi jıyrma jyl ishinde Qazaqstan qol jetkizgen iri jetistikterdiń biri – zaman talaptaryna saı jaraqtalǵan kásibı áskerdi qalyptastyrǵany. Elbasy Nursultan Nazarbaev aıtqandaı: «Bárinen buryn osy áskerı-tehnıkalyq jáne áskerı-strategııalyq salada qoǵamnyń, mem­le­kettiń, ekonomıkanyń, tipti tutas qoǵamdyq-saıa­sı júıelerdiń shyn qaýqary anyq kórinedi» («Ǵa­syrlar toǵysynda»). Sondyqtan Qazaqstan óziniń memlekettik táýelsizdigin barsha álemge jarııa etken kúnnen bastap Qarýly Kúshterin qalyp­tas­tyryp, ony zamana talaptaryna saı joǵary sapada jetildirý máselesin basty nazarda ustap keledi. 1991 jylǵy 25 qazanda Memlekettik qorǵanys komıteti túrinde qurylǵan organ keıinnen Qorǵa­nys mınıstrligi bolyp qaıta quryldy. Áskerı qaýipsizdik júıesin qurýdaǵy kelesi sheshýshi qadam Qazaqstan Respýblıkasynyń Qarýly Kúshteriniń qurylýy boldy. Bul úderis ońaıǵa túsken joq. Kóptegen qıyndyqtardy jeńe kele, táýelsiz eldiń tynyshtyǵy men qaýipsizdigin qorǵaıtyn úlken júıe qalyptasty. Aldymen Qazaqstan armııasy Qurlyq áskerleri, Áskerı-áýe kúshteri, Áýe shabýylyna qarsy qorǵanys áskerleri men Áskerı-teńiz kúshteri sekildi dástúrli tórt túrden turdy. Biraq ýaqyt talabyna saı jıyrma jyl ishinde Qarýly Kúshter qurylymyna eleýli ózgerister engizildi. Jedel-strategııalyq tapsyrmalardy oryndaýdy basqarý maqsatynda «Astana», «Batys», «Shyǵys», «Oń­tústik» óńirlik qolbasshylyqtary quryldy. Qarýly Kúshter qoldanylý salasyna baılanysty Qurlyq áskerleri, Áýe qorǵanysy kúshteri, Áskerı-teńiz kúshteri bolyp úsh túrli negizge kóshti. Jańa strategııalyq basqarý organy – Shtabtar bastyqtary komıteti quryldy. Búgingi álemdegi qaýipsizdik júıesi eleýli refor­malaýdy talap etti, jıi-jıi qarýly qaqty­ǵys­tar beleń aldy, túrli memleketterdiń strate­gııa­lary arasyndaǵy qaıshylyqtar arta túsýde. Osyǵan baılanysty qaterlerdiń aldyn alý men olardy joıý, jalpy alǵanda, eldiń daǵdarysqa qarsy áleýetin arttyrý maqsatynda ulttyq qaýip­sizdiktiń tıimdi zamanaýı júıesin qurý qajettiligi týdy. Sóıtip, 2007 jylǵy 21 naýryzda Qazaqstan Respýblıkasy Prezıdentiniń Jarlyǵy negizinde memlekettiń ulttyq, naqtyraq aıtqanda, áskerı qaýipsizdigine qatysty máselelerin retteıtin, eń aldymen qorǵanys sıpatyndaǵy jańa Áskerı doktrına qabyldandy. Osy qadamdardyń barlyǵy Qazaqstannyń Qarýly Kúshterdi damytý men jetildirýge baǵyttalǵan, pármendi saıası dıplomatııa­ǵa negizdelgen saıasatynyń jarqyn kórinisi. Mem­lekettiń qorǵanysqa qabilettiligin nyǵaıtý maq­satynda Qarýly Kúshterdiń ońtaıly qurylymy bekitilip, áskerimizdiń damý jolyndaǵy strate­gııalyq qazyǵy aıqyndaldy. Egemen Qazaqstannyń Qarýly Kúshteri kez-kelgen jaǵdaıda Joǵarǵy Bas Qolbasshy qoıǵan mindetterdi laıyqty oryndaýǵa árqashanda qabi­let­ti. Búgingi áskerimiz memlekettiń áskerı qaýip­sizdigine senimdi kepil bola alady. Sheteldik sarapshylardyń baǵalaýynsha, Qazaqstannyń Qarý­ly Kúshteri keńesten keıingi keńistiktegi ozyq úshtiktiń qatarynda, al Ortalyq Azııa aımaǵynda bizdiń armııa eń úzdik dep tanyldy. Táýelsizdik jyldarynda memlekettiń Qarýly Kúshterimen qatar áskerı mamandardy daıarlaý júıesi de qalyptasty. Bolashaq ofıserler daıar­laýdyń kóp salaly júıesine baǵyttalǵan joǵary oqý oryndary qatarynda Qurlyq áskerleriniń Áskerı ınstıtýty (burynǵy I.S.Konev atyndaǵy Almaty joǵary jalpy áskerı komandalyq ýchılıshesi) erekshe oryn alady. Qazir ınstıtýt 11 áskerı mamandyq boıynsha ofıserler daıarlap, Qazaqstan Qarýly Kúshterin kásibı mamandarmen qamtý isine orasan zor úlesin qosyp keledi. Ýaqyt talabyna sáıkes kóptegen ózgeristerge ushyraǵany­men bul joǵary oqý orny elimizdegi áskerı bilim berý isindegi kóshbasshy pozısııasynan aýytqyǵan emes. Onyń irgesinen bólinip shyqqan Ulttyq qorǵanys ýnıversıteti áskerı pedagogtar jáne áskerı ǵalymdar daıarlaýdaǵy áskerı adıýnktýra, doktorantýra, dıssertasııalyq keńes jumysy sekildi ózekti máselelerdi túbegeıli sheshti. Qorǵanys mınıstrliginiń Radıoelektronıka jáne baılanys áskerı ınstıtýty radıotehnıka salasyna mamandanǵan ofıserlerdi daıarlasa, Áskerı-teńiz ınstıtýty Qarýly Kúshterdi, UQK Shekara qyzmetiniń teńiz bólimderin jasaqtaý úshin mamandar ázirleıdi. Al áskerı ushqyshtar men avıasııanyń ınjenerlik quramynyń qatary jyl saıyn eki márte Keńes Odaǵynyń Batyry T.­J.Bı­geldınov atyndaǵy Áýe qorǵanys kúshteri áskerı ınstıtýtynyń túlekterimen tolyǵyp otyrady. Elimizdegi áskerı kadrlar daıarlaý isinde kishi komandalyq quram – kásibı serjanttar ázirleý de eskerilgen. Qorǵanys mınıstrliginiń Kadet kor­pýsy, S.Q.Nurmaǵambetov atyndaǵy «Jas ulan» mektebi sekildi oqý oryndary da Otan qorǵaý­shylar daıarlaý jolyndaǵy bir baspaldaq bolyp otyr. Áskerı sala mamandaryn daıarlaıtyn taǵy bir ordaly oqý orny – IIM Ishki áskerleriniń Joǵary áskerı ýchılıshesi, al joǵary oqý ornynan keıingi jáne qosymsha bilim berý baǵdarlamalaryn bul memlekettik qurylymnyń Áskerı akademııasy júzege asyrady. Elimizdegi taǵy bir ozyq áskerı oqý orny Ulttyq qaýipsizdik komı­te­tiniń Áskerı ınstıtýty bolyp taby­la­dy. Al ulttyq qaýipsizdik organ­dary­nyń shuǵyl jáne basshylyq qyz­metkerlerin daıarlaý, qaıta daıarlaý jáne olardyń biliktilikterin arttyrý isin Áskerı akademııa júzege asyrady. Tótenshe jaǵdaılar mınıstrligi­niń tehnıkalyq ınstıtýty bolsa, kási­bı órt sóndirýshiler men qutqarýshy­lar daıarlaıtyn joǵary oqý orny. Qorǵanys mınıstrliginiń Armııa orta­lyq sport klýby janyndaǵy Áskerı sport kolledji – orta kásibı bilimi bar joǵary synypty sportshylardy jáne sport mamandaryn daıarlaıdy. Osylaısha, Qazaqstannyń áskerı oqý oryndary elimizdiń qorǵanys qabi­lettiligi men egemendigin nyǵaıtý maq­satynda Qarýly Kúshter, basqa ás­kerler men áskerı quralymdar úshin kadrlar daıarlaýdy zamana talap­taryna saı sapaly júzege asyryp keledi. Táýelsiz Qazaqstannyń ulttyq jáne áskerı qaýipsizdigin qamtamasyz etý isine Qarýly Kúshterden bólek birneshe ásker túrleri jáne basqa áskerı quralymdar qatysady. Olar­dyń qatarynda Ishki ister mınıstr­liginiń Ishki áskerleri, Ulttyq qaýip­sizdik komıtetiniń Shekara áskerleri, Tótenshe jaǵ­daı­lar mınıstrliginiń áskerı bólimderi, Prezı­dent­tiń Kúzet qyzmeti jáne respýblıkalyq Ulan bar. Táýelsiz Qazaqstannyń qorǵanys jáne qaýip­sizdik salasyndaǵy aıryqsha qurylymdarynyń biri – respýblıkalyq Ulan el Prezıdenti N.­Á.Na­­zarbaevtyń usynysymen quryldy. Táýel­sizdik alǵannan keıin bizdiń elimiz halyqaralyq baılanystar aýqymyn keńeıtti, shetelderden keletin joǵary laýazymdy qonaqtardy qabyldap, halyqaralyq ádep talaptaryna saı hattamalyq sharalar ótkize bastady. Sol kezeńde aıryqsha memlekettik mindetterdi atqaryp, el qaýipsizdigin qorǵaý isine úles qosatyn arnaıy organ qurý qajet boldy. Oǵan joǵary laýazymdy tulǵalardyń qaýipsizdigin qamtamasyz etý, dástúrlik rásimderdiń oryndalýyna qatysý, asa mańyzdy memlekettik obektilerdi, Memlekettik tý men Memlekettik eltańba etalondaryn kúzetý júkteldi. Al áskerı jáne tótenshe jaǵdaı rejimi kezinde respýb­lıkalyq Ulan Qazaqstan zańdarynda kózdelgen tártippen is-sharalardy júzege asyratyn bolyp bekitildi. Elbasy Nursultan Nazarbaev respýblıkalyq Ulannyń damý barysyn muqııat qadaǵalap, jaýyngerlik daıarlyq, tehnıkalyq jáne tyldyq qamtamasyz etý, áskerıler otbasylaryn áleýmettik jeńildiktermen qamtý máselelerin únemi nazarda ustaıdy. Soǵan saı alǵashqy jaýyngerlik qyzmet kúnderinen bastap-aq respýblıkalyq Ulannyń áskerı qyzmetshileri qurylymnyń joǵary mártebesine saı bolýǵa, Prezıdent – Joǵarǵy Bas Qolbasshy qoıǵan mańyzdy tapsyrmalardy sapaly oryndaýǵa tyrysyp keledi. Respýblıkalyq Ulan qurylǵannan bergi 19 jyl ishinde onyń qatarynda on myńnan astam sarbaz áskerı daıarlyqtan ótti. Olardyń kópshiligi res­pýb­­lıkamyzdyń túrli qýatty qurylymdarynda qyz­mette. Qandaı qyzmet atqarsa da, olar bizdiń qurylym qatarynda boılaryna sińirgen jaýyn­gerlik qasıetterimen, patrıottyq sezimimen erekshelenip turady. Respýblıkalyq Ulannyń komandırleri elı­tarlyq qurylymnyń joǵary mártebesine saı bolý úshin barlyq kúsh-jigerin salady. Ulannyń alǵash qurylǵan kúninen bastap osy ýaqytqa deıin jaýyngerlik ázirlik jaǵdaıyna, komandırlik jáne jaýyngerlik daıarlyqqa, tárbıe jáne áleýmettik-quqyqtyq jumysqa, áskerı tártiptiń, zańdylyq pen quqyqtyq tártiptiń saqtalýyna, qarýlaný, tehnıka men tyldyq qamtamasyz etý máselelerine aıryqsha mańyz berilip keledi. Bul salalardyń qarqyndy damýy – soǵys jáne tótenshe jaǵdaı rejimi kezinde Qazaqstan Respýblıkasy zańnamasyna sáıkes áreket etýge degen joǵary jaýyngerlik jáne shuǵyl-qyzmettik ázirliktiń kepili. Respýblıkalyq Ulan sarbazdary men sardar­lary el táýelsizdiginiń jıyrma jyldyǵyn bıik meje dep biledi. Olar osy ýaqyt ishinde jas memleket qol jetkizgen jetistikterdiń qadirin tereń túısinedi. Qarqyndy damý ústindegi zaıyrly mem­lekettiń bir bólshegi retinde respýblıkalyq Ulan aldaǵy kúnderge tolaǵaı maqsattar qoıyp otyr. Jaýyngerler Elbasy men halyqtyń qaýipsizdigi jolynda aıanbaı ter tógip, joǵary jaýyngerlik ázirlikte bolýdy kózdeıdi. Qazaqstannyń jańa tarıhyndaǵy aıtýly kezeń – jıyrma jyldyq mereıtoı qarsańynda res­pýb­lıkalyq Ulan jeke quramynyń atynan barlyq otandastarymdy quttyqtap, elge amandyq pen tynyshtyq, molshylyq pen baıandy bolashaq tileımin. Ardaqty Otanymyzdyń baǵy bıikteı bersin. Abaı TASBOLATOV, respýblıkalyq Ulan qolbasshysy, general-leıtenant.