Sonymen, 16 qyrkúıekke deıin Golovkın-Alvares jekpe-jegi týraly siz bilýińiz kerek 5 faktini nazarlaryńyzǵa usynamyz.
Birinshi: 16 qyrkúıektegi jekpe-jekte WBA, WBC, IBF, IBO jáne The Ring jýrnalynyń tıtýly sarapqa salynady. Ol kúni Gennadıı Golovkın WBA sýperchempıondyq belbeýin 18-shi, WBC belbeýin 3-shi, IBF belbeýin 4-shi, IBO belbeýin 16-shy ret qorǵasa, Alvares The Ring jýrnalynyń tıtýlyn 2-shi ret qorǵaıdy.
Ekinshi: Aldyn-ala boljam boıynsha, álem jankúıerleri kútken jekpe-jek T-Mobile arenasynda ótýi múmkin. Taraptar kezdesý ornyn aldaǵy ýaqytta naqtylaıtynyn aıtty. Eger kezdesý T-Mobile arenasynda ótse, Golovkınniń Las-Vegastaǵy tuńǵysh, al AQSh-taǵy 11-shi jekpe-jegi bolmaq. Arenanyń syıymdylyǵy – 20 000 myń adam.
Úshinshi: 16 qyrkúıek – Meksıka memleketiniń táýelsizdik kúni. 1810 jyldyń dál osy kúni Ispanııadan táýelsizdigin alý úshin soǵys bastaǵan bolatyn. «Kanelo» sońǵy ýaqytta negizgi jekpe-jekterin Meksıkanyń eki uly merekesi qarsańynda ótkizip júr. Birinshisi, táýelsizdik kúni bolsa, ekinshisi mamyr aıyndaǵy «Sınko de Maıo» (Besinshi mamyr) merekesi.
Tórtinshi: Brıtandyq boxrec saıtynyń reıtıngi boıynsha eki salmaq dárejesiniń birinshi oryn ıegerleriniń aıqasy bolmaq. Golovkın 160 fýnt (72,500 kılo), Alvares 154 fýt (69,900 kılo) salmaǵynyń úzdigi. Jekpe-jek orta salmaqta ıaǵnı, 160 fýntta ótedi. Jeńiske jetken boksshy orta salmaqtyń koroli atanady.
Besinshi: Golovkın-Alvares jekpe-jegi resmı málimdelgen soń qos boksshynyń alǵashqy pikiri:
Gennadıı Golovkın: Men óte qýanyshtymyn, bári men oılaǵandaı bolyp jatyr. Maǵan Alvarestiń búgingi jekpe-jegi unady, biraq kúzde – bıg-drama-shoý bolady. «Kanelo» meniń kareramdaǵy eń úzdik boksshy. Qyrkúıektegi kezdesýde oǵan sáttilik tileımin.
Saýl «Kanelo» Alvares: Gennadıı, dosym, sen meniń kelesi qarsylasymsyń. Men 16 jasymda kásipqoı boksty bastadym, óıtkeni men eshqashan qoryqqan emespin. Golovkınmen jekpe-jek ótkizetinime qýanyshtymyn. Mende qazirge deıin qıyn jekpe-jekter bolǵan jáne aldaǵy kezdesýimde ońaı bolmaıtynyn bilemin. Men únemin aıtamyn: «Kanelo» Alvares úzdik, óıtkeni eń myqty boksshylarmen judyryqtasady».
Álı Bıtóre, «Egemen Qazaqstan»
