Kúlkiden shattyq syılady

Astananyń týǵan kúnin aıryqsha etip atap ótý jyldan jylǵa maǵynalyq jaǵynan tolysyp keledi. Osy kúni qala turǵyndary men qonaqtaryna shattyq syılaý árbir óner adamynyń asqaq armanyna aınalǵandaı. Sondaı merekeli kóńil-kúı syılaǵan konsert Kongress-holda «Kóńildi Astana. Bazar joq!» degen atpen bolyp ótti. Negizinen konserttik baǵdar­lama saǵat 17 jáne 20-ǵa belgilense, kelýshilerdiń kóp bol­ǵany sonsha bıletter qoldan qolǵa ótti. Konsertke tipti qart­tar men arbaǵa tańylǵan múge­dek jandar da kelipti. Bul mezet ishte qyzý daıyndyq júrip jatqan-dy. Biz uıymdastyrý ju­mystarymen shapqylap júr­gen Astana qalalyq kóńildiler men tapqyrlar teatrynyń bas ákimshisi Baǵı Baqytbekti birer mınýtqa sózge tartyp úlgerdik. Onyń aıtýynsha, birinshi konsert qaıyrymdylyq sharasy bolǵandyqtan, bıletter jetimder úıine, múgedek jandarǵa jáne zeınetkerler men turmys jaǵdaıy tómen otbasylarǵa tegin taratylǵan. Mundaı konserttik baǵdarlamany uıymdas­tyrýǵa qalalyq ákimdik pen mádenıet departamenti uıytqy bolypty. Osy rette konserttiń ereksheligi sol, parodııalyq monologtardy ár akter jeke jeke oryndap, artynan estrada juldyzy án shyrqaıdy. Osy­laısha akter men estrada jul­dyzy juptasqan toǵyz top bir-birimen saıysqa túsedi. Qaı topqa kórermen kóbirek qol soqsa, sondaı-aq arnaıy baqy­laýshylardyń sheshimi boıynsha sol jupqa baǵa beriledi. Keshte teatr ártisterimen birge estrada juldyzdary Mádına Sadýa­qasova, Dosymjan Tańatarov, «Báıterek» toby, Zattybek Kóp­bosynuly jáne ózgeleri baq­taryn synasty. Sahnaǵa shyqqan alǵashqy jup ártis Oljas Sydyqbekov pen ánshi Mádına Sadýaqasova boldy. Oljas bul jolǵy qoıylymynda Astana qalasy­nyń ákimi Imanǵalı Tasmaǵan­betov­tiń el aldyndaǵy esebin ázilge burmalap, parodııalyq tásilmen ákim beınesin somdady. Mádına óziniń nazdy da­ýysymen tyńdarmandaryn saz­dy ánge qanyqtyrdy. Sóıtip, bul jup kórermenniń yqy­lasyna bólenip, eń joǵary baǵa alǵandardyń qatarynan tabyl­dy. Kelesi jup erli-zaıypty Qaırat pen Baqyt Dombaevtar da ózindik ónerlerimen kópshilik kóńilin qýantty. Ásirese Ba­qyttyń shyrqaǵan áni zal ishinde erekshe qalyqtady. Onyń ústine sahna tórinde qoldan qolǵa ushyp-qonyp júrgen appaq qardaı kepterler ózindik jara­symyn tapqandaı áser berdi. Basqalary da bul údeden shyq­ty. Mysaly, myna ázil qala kúnin asha túsken ádemi bir ázil boldy. Buryn qaıdan keldiń dese, Astanadan deseń, «oıbaı, ma­sasy soıqan, qaqaǵan sýyqta qalaı turyp jatyrsyńdar?!.» dep tańdanyp jatsa, qazir «o», dep tańyrqaıtyn boldy, degen ázildiń artynda úlken shyndyq jatqany ártistiń aýzynan erekshe kóńildi shyqty. Teatrdyń dı­rektory ári kórkemdik jetekshisi Tursynbek Qabatovtyń sózimen aıtqanda, bul mereke Qazaq eliniń elordany pash etken merekesi boldy. Taǵy bir belgili bolǵany, byltyr 23-shi qyrkúıekte qurylǵan teatr jańa ártistermen tolyǵyp, óz repertýaryn keńeıte túsipti. Jalpy teatr alda jańa qoıy­lymdar men baǵdarlamalaryn usynýdy oılastyrýda. Úsh saǵatqa sozylǵan konserttik baǵdarlamada jeńil ázil­men qatar saıası salmaǵy basym qaljyńdar da kórermen kóńi­linen shyqty. Bir baıqa­ǵany­myz, qazirgi ıýmordyń ómir kóshinen qalmaı kele jatqan­dyǵy. Astana kúnine tartý bolǵan konserttik baǵdarla­manyń qala turǵyndary men qonaqtaryna syılaǵan kúlkisi kópke deıin kóńilde qalary sózsiz. Asqar TURAPBAIULY.