Maqtanatyn jaıt emes, árıne. О́tken jyly jasóspirimder jasaǵan 24 qylmys tirkeldi. Jyl basynan beri 10 qylmysqa buzaqy balalardyń aralasqany anyqtaldy. Oblys prokýrorynyń aǵa kómekshisi Ásemgúl Abdrahmanova jasy kámeletke tolmaǵan alty bala 29 quqyq buzýshylyq deregimen tirkelgenin aıtady. Al bir jasóspirim jalǵyz ózi 18 ret urlyqpen ustalypty.
Kámeletke tolmaǵandardyń isteri jáne olardyń quqyqtaryn qorǵaý jónindegi oblystyq komıssııa otyrysynda osyndaı málimetter jarııa etildi. Atyraý qalasy ákiminiń orynbasary Meıirim Qalaýı bıyl birinshi ret quqyq buzǵan balalardy ata-analarymen jıynǵa qatystyrý tájirıbesi engizilgeninen habardar etti. Alaıda, keıbir ata-analar balalaryn ári qaraı tárbıeleı almaıtyndaryn aıtyp, bas tartqan. Endi atalǵan komıssııa qala mektepterin tekserý jumysyn qolǵa alǵaly otyr.
Taǵy bir másele baspana kezeginde turǵan ata-ana qamqorlyǵynsyz qalǵan 881 balaǵa zańdylyqqa sáıkes páter berilgen edi. Alaıda, memleket qamqorlyǵyn tolyqqandy sezinbeı, alǵan úılerin berekesiz oıyn-saýyqqa aınaldyryp otyrǵandar da bar. Oblystyq ishki ister departamenti basshysynyń orynbasary Nurym Orazbaev «Nursaıa» shaǵyn aýdanyndaǵy №14 úıdiń janynda ornalasqan dúken satýshylarynan shaǵym túskenin aıtady. Dúkenge urlyq jasap júrgender sol jerde turatyn balalar úıiniń túlekteri. «Qazir atalǵan úıdiń ár qabatynan polısııa qyzmetkerlerine páter bólinip, tártip qalypqa keltirildi. Polısııa qyzmetkerleri barlyq jaǵdaıdy baqylap otyr», – deıdi N.Orazbaev.
«Qıyn balalardyń» kóbi ata-anasy urpaq tárbıesine nemquraıdy qaraıtyn, tym jumysbasty nemese zııandy ádetterge beıim otbasylardan shyǵady. Oblys ákiminiń orynbasary Álibek Náýtıev jasóspirimderge kásiptik bilim berý, aýla klýbtaryn ashý, bos ýaqyttaryn tıimdi ótkizý syndy sharalar jaqsy nátıje beredi degen pikirde. Oqýshylardy úıirmelermen qamtý kórsetkishi oblysta 32,2 paıyz ǵana. Osy jumysty jandandyrý maqsatynda jaqynda arnaıy joba bastaý alady.
Baqytgúl BABASh,
«Egemen Qazaqstan»
ATYRAÝ
