Prezıdentimiz: «Bolashaqta ulttyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalady», degen bolatyn. Bul ulttyq ustanym bolýy tıis. Árbir qazaqstandyq memlekettik tildi jetik meńgerip, aǵylshyn, orys tilderine basa nazar aýdarýy kerek, sonymen qatar, qazirgi zaman talabyna saı ozyq tehnologııalardy ıgerý, eń bastysy, mádenı bolmysymyzdy jańǵyrtý árbir qazaqstandyqtardyń tól mindeti bolmaq. Bul – bolashaqtyń kilti.
Baǵdarlamalyq maqalada «Pragmatızm − ózińniń ulttyq jáne jeke baılyǵyńdy naqty bilý, ony únemdi paıdalanyp soǵan sáıkes bolashaǵyńdy josparlaı alý, ysyrapshyldyq pen astamshylyqqa dańǵoılyq pen kerdeńdikke jol bermeý» – dep, Elbasymyz dóp aıtqan. Rasynda, bizdiń qoǵamymyzda da kúndelikti turmysymyzda qol jetken tabystarǵa toqmeıilsý, masattaný, keýdemsoqtyq áreketterdiń qubylystaryn, asta-tók ysyrapshyldyqtyń bolyp jatqanyn kún saıyn kezdestirip júrmiz. Sondyqtan, qaı-qaısymyz da «Asqandy da kórgenbiz, tasqandy da kórgenbiz, Asyp-tasyp aqyry sasqandy da kórgenbiz», degen halyqtyq naqyldy esten shyǵarmaǵanymyz abzal.
Prezıdent atap kórsetkendeı, «Rýhanı jańǵyrý tek búgin bastalǵan jumys emes». Keńes ókimetiniń solaqaı saıasatynyń kesirinen qazaq halqy tilinen, dininen, dilinen, ulttyq sana-seziminen túgeldeı aıyrylyp qala jazdady. Keńestik bılik qazaq halqyn tarıhsyz halyq jasaýdy kózdedi. Táýelsizdiktiń arqasynda ǵana ólgenimiz tirilip, óshkenimiz jandy. Táýelsizdik kezeńinde bul baǵytta birneshe aýqymdy ister atqaryldy.
Prezıdenttiń elimizdiń latyn qarpine kóshýin erterek qolǵa alyp, daıyndyq jumystaryn tezirek júrgizý qajettiligi týraly úkimet pen ǵalymdarǵa bergen tapsyrmasy da óte quptarlyq is. Bizdiń oıymyzsha, táýelsizdiktiń alǵashqy jyldary Eltańba, Ánuran, Tý, Ata Zańymyzdy qabyldaǵanymyz, keıinirek elordany Almatydan Astanaǵa kóshirýimiz sekildi, bul da qazaq halqy úshin sanany jańǵyrtýdyń bir tetigi bolyp tabylady. Sonymen birge, latyn qarpine kóshý arqyly túrki álemimen birigýimizge, jahandyq órkenıetke kirigýimizge jol ashyla túsedi.
Alaıda, elimizde baǵa jetpes úzdik
týyndylardy óz ishimizde joǵary deńgeıde tanyp, nasıhattaǵanymyzben, álem halqy beıhabar qalyp keledi. Atalǵan maqalasynda Nursultan Ábishuly Máńgilik Eldi ádebı, mádenı jaýharlardy suryptap, ony ózge elderge tanytý maqsatyn alǵa qoıyp otyr. Osy jolda «Jahandaǵy zamanaýı qazaqstandyq mádenıet», «Qazaqstandaǵy 100 jańa esim» syndy jobalardy usynyp, eldiń rýhanı jádigerlerin saqtap, nasıhattaý mindeti týyndaıdy. Qazaqstannyń «Kıeli jerleriniń geografııasyn» jasaý eltanym ǵana emes, mádenı-tarıhı oryndarymyzdyń kórkeıýine, týrızmniń damýyna jol ashatyny sózsiz. Al «Jahandaǵy zamanaýı qazaqstandyq mádenıet» jobasy ulttyq ádebıetimiz ben ónerimizdiń ozyq úlgilerin zertteýge, jarııalaýǵa múmkindik beredi.
«Týǵan jer» atty baǵdarlama qabyldaýdy usynǵan Elbasy árbir otandasymyzdyń, jastardyń patrıottyq sezimin arttyrý úshin aımaqtarda ólke tarıhyn keńinen nasıhattap, týǵan jerine kómek qolyn sozyp júrgen jandarǵa qurmet kórsetý joldaryn qarastyrý qajettigi eskerilgen. «О́ser eldiń balasy birin-biri batyr der...» degendeı, elge tanymal tulǵalarymyzdy qadirlep, ólke tarıhyn zertteýge, zerdeleýge kóp kóńil bólýimiz kerek.
Elbasynyń baǵdarlamalyq maqalasy qazirgi zamanǵy Qazaqstannyń strategııalyq baǵyt múddelerin aıqyndaıtyn jańa ıdeologııalyq tujyrymdama bolyp tabylady.
«Men barsha qazaqstandyqtar, ásirese, jas urpaq jańǵyrý jónindegi osynaý usynystardyń mańyzyn tereń túsinedi dep senemin», dep Elbasy aıtyp ótkendeı, elimizdiń bolashaǵy jastardyń qolynda, óskeleń urpaqqa Elbasynyń da artar senimi mol. Endeshe, sol senimnen shyǵa bileıik.
Áıgerim Espenova,
M.O.Áýezov atyndaǵy Ádebıet jáne óner ınstıtýtynyń kishi ǵylymı qyzmetkeri
