Qaraǵandy oblysy boıynsha TJ departamenti óńirdegi aýa-raıynyń kúrt ózgeretindigin eskertedi.
«17-19 mamyr aralyǵynda oblystyń ásirese soltústik jáne ortalyq aýdandarynda -5 gradýsqa deıin sýyq bolady dep kútilýde. Turǵyndardyń aýa-raıy ózgeristeri jaıly aqparatty baqylap, saq bolýǵa, balalardy qaraýsyz qaldyrmaı, kún raıyna qaraı kıinýge keńes beriledi. Budan ózge, túngi ýaqyttarda jáne aýa-raıy sýytqan jaǵdaıda alys saparlarǵa shyqpaý kerektigi eskertiledi», dep habarlaıdy TJ departamenti.
Sondaı-aq, TJ komıteti elimizdiń basqa da tórt aýdandarynda aýa temperatýrasynyń kúrt tómendeýin aldyn ala eskertedi. TJ komıtetiniń habarlaýynsha, 16-17 mamyr kúnderi túngi ýaqyttarda Soltústik Qazaqstan jáne Pavlodar oblystarynda, 17 mamyr kúni túnde Aqmola jáne Qostanaı oblystarynyń keı jerlerinde aýa temperatýrasy 3 gradýsqa deıin tómendeıdi dep kútilýde.
