Bir jaǵynan bıýtı ındýstrııa jahannyń kózqarasyn teńestiretin bir tetik. Tipti, bıznestiń bul salasy sol ǵalamdasýdyń búlkildep turǵan kúretamyry desek te bolady. Mysaly, sońǵy on jylda aryq qyzdar trendke aınaldy. Sonyń arqasynda dıetologtarǵa, fıtnes zaldarǵa, aryqtaýǵa arnalǵan dári-dármek óndirýshilerge tolassyz násip tabyldy. Sol sán bıkeshtershe boıaný men kıiný, sońǵy trendten qalmaý, brendterdi túgendeý – osy kásipti úlken ındýstrııa deńgeıine deıin ósirip jibergen.
Psıhologtar jarnamanyń erlerge qaraǵanda áıelderge ótimdi ekenin baıaǵyda dáleldegen. Al qyraǵy kózdi mass-market bul múmkindikti jibere qoımaıdy. Sonyń arqasynda búgingi áıelder dúnıeni daǵdarys túgili ajdaha jutqaly tursa da, boıanýyn toqtatpaıtyn dárejege jetti. Boıaýmen birge týmaq joq, biraq janyn berýge deıin baratyn názik jandylar bar. Názik jandy demekshi, ındýstrııa jasaýshylar názik psıhıkanyń osal tustaryn baıaǵyda-aq torǵa túsirip qoıǵan. Biraq bul da bir qumar oıyn sekildi adam psıhıkasyna áser etý arqyly aqsha jasaý ekendigin tis jaryp eshkim aıtqysy kelmeıdi. Nesi bar? Sulý bolǵan jaman ba? Birinen biri ótip turǵan sulýlyq jer degen ǵalamshardyń mańdaıyna tar keledi deısiń be? Bul beauty ındýstrııaǵa qysqasha ǵana sholý bolsyn. Endi osy salanyń búgingi tynysyna toqtalaıyq.
Bıýtı trend
Álemdik deńgeıdegi vızajıster bıyl bıkeshterge boıanǵanda álpettegi tabıǵı reńkti saqtaýǵa mán berýge keńes beredi. Jáne kásibı makııaj – qıyn degen qaǵıdany umytatyn kez keldi. Qoljetimdi boıaýlarmen-aq bet múshelerin aıqyndap shyǵýǵa bolady. Qazir erinde uzaq saqtalatyn qaryndash pen sý quramdy suıyq haılaıterler trendke aınalǵan. Eger tonaldy kremdi sý quramdy haılaıterge aralastyryp jaqsa, joǵaryda aıtqan tabıǵı qabat túzilgen bolar edi. Bul tájirıbe vızajıster tarapynan tekserilgen. Al qyzǵylt tústi dalaptardyń sándi ekenin aıtýdyń ózi artyq shyǵar. Nege deseńiz, baıaǵy tabıǵılyqtyń sánge kirgenin kóldeneń tartamyz. Sodan soń bir taldap jabystyratyn kirpikter, lentaly kirpikterge ornyn berdi. Lentaly kirpikter adamnyń óz kirpigine zııanyn tıgizbeıdi. Sosyn vızajıstiń kómeginsiz, ózińiz jabystyryp, alyp tastaýyńyzǵa bolady.
Sol sııaqty soıaýdaı tyrnaqtar da sánnen qaldy. Endi tyrnaqty ósirmeı, ony ashyq qyzǵylt, sary, ıakı kógildir túske boıaǵan durys.
Jazda qalaı boıaný kerek?
Jazdyq makııajda erindi qanyq tústermen boıaýdan qoryqpaý qajet. Erin boıaǵy uzaq kúnge saqtalý úshin tıntterdi paıdalansa bolady. Tınt koreıler oılap tapqan trend. Quramyndaǵy boıaýshy pıgment terige tez sińip, 10 saǵat boıy erin boıalǵandaı alqyzyl túske enedi. Keıingi kezde vızajıster qaýymy tıntti óńlik (rýmıana) retinde betke de jaǵyp júr. Álemdik bıýtı blogerler tıntke anyqtama bergende dalap jáne óńlik qyzmetin atqaratyn kosmetıkalyq tóńkeris degendi jıi jazýda.
Al terini kúnnen qorǵaý úshin SPF kremderin paıdalanǵan durys. SPF kremderin ýltrakúlgin sáýlelerden qorǵaıdy. Olardyń quramyna qaraı, qorǵaý qýaty da ártúrli bolady.
Uzyn kóılekpen krossovka kıgen ersi emes
Uzyn kóılekter men beldemsheler bıkeshterdi sulý ári tartymdy etip kórsetedi. Al osy kıimderdi kedamen nemese krossovkamen kııýge bolatynyn bilesiz be? Árıne, fıtneske barǵanda nemese marafonǵa kıetin krossovkany uzyn beldemshemen kııýge kelmeıdi. Kóılekpen kıetin aıaqkıimniń bul túri súıkimdi ári súıirleý keledi.
Kejýal degen ne?
Kejýal (Casual aǵylshyn sózi) yńǵaılylyq pen erkin qozǵalyp turýǵa negizdelip tigilgen kıim. Bul stıl túri HH ǵasyrda Eýropada paıda bolǵan. Klassıka men sporttyq stıldiń úılesken túrin keziktirseńiz kejýal dep uqqaısyz. Krossovka men kóılek kııý de osy stıldiń beleń ala bastaǵanyn baıqatady.
Qazaqstandaǵy bıýtı ındýstrııa naryǵy sońǵy 5 jylda 15,8 paıyz ósipti (Forbes jýrnalynyń málimeti). Demek bul bıznestiń bolashaǵy áli alda degen sóz. Daǵdarysqa des bermeıtin ekonomıkanyń bul salasyn durystap qolǵa alsa, paıdaǵa kenelýge bolady. Onyń ústine, betmaılar men boıaýlardy jasaý barysynda azııalyq, shyǵystyq bolmys degen túsinik bar. Osy turǵydan alǵanda ózimizdiń tabıǵı ónimderden alynǵan kosmetkalyq ónim, bizdiń tabıǵatymyzǵa jaqyn bolmaq.
Sán álemine saıahat jasaǵan Aınur TО́LEÝ
