Dúbirli básekege elimizdiń óńirlerinen bólek, О́zbekstan, Qyrǵyzstan, Grýzııa, Reseıden sportshylar qatysty. Dzıýdoshylar 14 salmaq dárejesi boıynsha synǵa tústi.
Jarystyń saltanatty ashylý rásimine Pavlodar qalasynyń ákimi Nurjan Áshimbetov, dzıýdodan Beıjiń Olımpıadasynyń kúmis júldegeri, Qazaqstan Dzıýdo federasııasynyń damý jónindegi dırektory Ashat Jıtkeev qatysty.
– Halyqaralyq týrnır – dzıýdoshylardyń sheberligin shyńdaıtyn tamasha mektep. Dástúrli dodanyń deńgeıi ýaqyt ótken saıyn ósip keledi. Sondyqtan, mundaı jarysta baq synaý jas-
tardy jigerlendire túsedi. Sondaı-aq, týrnırdiń shet elderde de tanyla bastaýy qýantady, – deıdi Ashat Jıtkeev.
О́kinishke qaraı, halyqaralyq týrnırden pavlodarlyq sportshylarǵa bir kúmis júlde ǵana buıyrdy. Ony 78 kılodan joǵary salmaq dárejesinde synǵa túsken Almagúl Kashına ıelendi. Jergilikti bapkerler senim artqan Arman Mahambetov, Serik Sálmenov, Adam Bogatyrev, Irına Krıvenko syndy sportshylar júlde aýylynan tys qaldy.
Áıelder arasynda qaraǵandylyq Áıgerim Tóreǵojına (48 kg), Nazgúl Elmuratova (ShQO, 52 kg), Ksenııa Beldıagına (Qyrǵyzstan, 57 kg), Nazgúl Qubasheva (Atyraý, 63 kg), Janar Qashqyn (Almaty oblysy, 70 kg) jáne Araılym Shegenova (Jambyl oblysy, 78 kg) óz salmaqtarynda jeńimpaz atandy.
Erler básekesinde Qylysh Erenǵaıypov (Qaraǵandy, 60 kg), Erlan Jaqsybekov (Qyzylorda, 66 kg), Aıdyn Dartaev (Qaraǵandy, 73 kg), Farhat Serikov (Atyraý, 81 kg), Almas Akrashev (ShQO, 90 kg), Maqsat Issaǵabylov (Qyzylorda, 100 kg) jáne Erasyl Qajybaev (ShQO, 10 kılodan joǵary) úzdik shyqty.
Farhat ÁMIRENOV,
jýrnalıst
PAVLODAR
Sýretti túsirgen
Valerıı BÝGAEV
