Qazaqstan polısııasynyń shırek ǵasyrlyq mereıtoıyna mańǵystaýlyq tártip saqshylary belsendi is-qımylmen, tynyshtyqty qamtamasyz etýdegi daıyndyqpen keldi. Olar jumysqa degen jaýapkershilikpen birge, el men jerdiń kórkeıýine, gúldenýine óz úlesterin qosýdy azamattyq paryz sanaıdy. Izgi sharalardyń biri Jańaózen qalalyq ishki ister basqarmasynda kórinis tapty, olar 25 jyldyq merekege arnalǵan is-sharalardy aldymen bastap, basqarma aýlasyna aǵashtar otyrǵyzyp, nysan aınalasyn tazartty.
Jańaózenniń kórkine kórik qosamyn dep jumylǵan jumysqa polıseı sapyndaǵy 25 jas býyn men 25 jyl quqyq qorǵaý salasynda eńbek etip júrgen aǵa býyn ókilderi jáne Jańaózen qalalyq IIB qyzmetkerleri qatysty.
– Bul sharanyń maqsaty – jańadan kelgen jas tártip saqshylaryna 25 jyl ishki ister organynda eńbek ótili bar aǵa býyndardyń tek ózderiniń qyzmetterinde ǵana emes, qoǵamdyq jumystarǵa da atsalysatyndyǵyn uǵyndyrý, jastardy patrıottyq tárbıege baýlý. Jasy úlken aǵa býyn ókilderinen úlgi-ónege alyp, óz eńbekterine adaldyǵyn, halyqtyń ishki ister organyna degen senimdiligin nyǵaıtý bolatyn, – deıdi Jańaózen qalalyq IIB bastyǵy, polısııa polkovnıgi Amangeldi Asqaruly.
Aǵa býynnyń ónegeli isine jas polıseıler de rıza. «Tek bul ǵana emes, kópti kórgen aǵa-apalarymyzdan alatyn patrıottyq tárbıemiz de, tájirıbemiz de, úlgi-ónegemiz de áli kóp dep sanaımyn», – deıdi jas býynnyń ókili, Jańaózen qalalyq IIB ÁPT ınspektor polıseıi Q.Qattybekov.
Jańaózendik tártip saqshylary qoǵamǵa paıdaly is atqara otyryp, áriptesterin merekemen quttyqtap, elimizge tynyshtyq tilegen aqjarma tilekterin joldady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
