Jıyndy asha otyryp, Qyzylorda oblysynyń ákimi Qyrymbek Kósherbaev shaǵyn jáne orta bıznesti, onyń ishinde mıkrokásipkerlikti damytý aımaq úshin basym baǵyt ekenin atap ótti. Máselen, óńirlik kásipkerler palatasymen birlesip júzege asyrylyp jatqan «Mıkrobıznes-Qyzylorda» jobasy aıasynda jalpy somasy 840 mln teńge bolatyn 132 joba qarjylandyrylyp, 429 jańa jumys oryndary ashyldy. Al qarjynyń qaıtarylýy 100%-dy quraıdy.
Budan bólek, Qyzylorda oblysyndaǵy jappaı kásipkerlikti damytýdyń Biryńǵaı jol kartasy ázirlendi. Jol kartasyn jasaýdaǵy maqsat – kásipkerlikti qoldaý sharalaryna arnalǵan barlyq baǵdarlamalardy tıimdi júzege asyrý arqyly jumyssyzdar men ózin-ózi jumyspen qamtýshylar arasynda jańa jumys oryndaryn qurý jáne kásipkerler sanyn arttyrý.
«Biz árbir selolyq okrýg pen aýdan, qala úshin ekonomıkanyń salalary boıynsha barlyq ındıkatorlardy oblys ákimdiginiń ahýaldyq ortalyǵyna júktedik. Osy arqyly jappaı kásipkerlikti damytýda aýyl, aýdan, qala ákimderiniń, qarjy ınstıtýttarynyń jáne memlekettik organdardyń jumysyn ashyq qadaǵalaı alamyz», dedi Q.Kósherbaev.
О́ńirlik kásipkerler palatasynyń dırektory Ǵalymbek Jaqsylyqov shaǵyn jáne orta bıznesti damytýda aımaqta atqarylyp jatqan jumystar týraly jáne kásipkerlerdiń qyzmetine keri áser etip otyrǵan ákimshilik kedergiler týraly baıandady.
«Atameken» UKP tóralqa tóraǵasy jıyndy qorytyndylaı kele, Qyzylorda oblysyndaǵy kásipkerlikti damytý baǵytynda atqarylyp jatqan jumystarǵa joǵary baǵasyn berdi.
«Bizdiń mindet bıznes pen bılik arasynda dıalog ornatý. Qyzylorda oblysynda bul jumystar tolyǵymen atqarylýda, al kásipkerlikti damytýda oblys ákimdiginiń júrgizip otyrǵan is-sharalary respýblıkada ozyq tájirıbe bolyp sanalady», dep atap ótti T. Qulybaev.
«Atameken» UKP basshysy ekonomıkany jáne jeke kásipkerlikti damytýǵa qosqan jeke úlesi úshin oblys ákimi Qyrymbek Kósherbaevty Palatanyń «Isine adaldyǵy úshin» medalimen marapattady.
