Memorandýmda qoǵamdyq-saıası, mádenı, bilim berý, ǵylym jáne aqparat salalaryndaǵy yntymaqtastyqqa, eki eldiń jaqyndasýyna, halyqtyq dıplomatııanyń nyǵaıýy men damýyna yqpal etetin birlesken jobalar men is-sharalardy ázirleý jáne iske asyrý josparlanǵan bolatyn.
«Qazaqstan halqy Assambleıasy» ǵımaraty aldynan jolǵa shyqqan kerýendi shyǵaryp salý rásiminde oblystyq «Qoǵamdyq kelisim» MKK basshysy Erbol Baıqonaqov, Túrkistan qalalyq aqsaqaldar alqasynyń tóraǵasy Jarylqasyn Áziretbergenov, oblystyq «О́zbek» etnomádenı birlestiginiń tóraǵasy, oblystyq máslıhattyń depýtaty Badrıddın Nıshankýlov sóz sóılep, bul shara Elbasynyń «Bolashaqqa baǵdar: rýhanı jańǵyrý» atty maqalasyna qoldaý ári eki baýyrlas el arasyndaǵy dostyq qarym-qatynasty nyǵaıtý maqsatynda uıymdastyrylyp otyrǵanyn aıtty.
– Bul sapar eki elge baýyrlastyqty ári qaraı arttyra berýge septigin tıgizedi, – deıdi Túrkistan qalalyq ardagerler keńesiniń tóraǵasy Jarylqasyn Áziretbergenov. – Budan bes jyl buryn da jolymyz túsken. Sonda biz kórshi ózbek elinen alar úlgimiz barshylyq ekenin uqqanbyz. Máselen, ol jaqtyń turǵyndary túgelimen barlyǵy 100 paıyz ana tilinde sóıleıdi. Sosyn jastary óte izetti. Betińe qarap sóılemeıdi. Qoldaryn kókiregine qoıyp, tek izettilik tanytady. Qarııalar ol jaqta kezek kútpeıdi. Jastardyń qurmeti kúshti. Osyndaı qasıetter bizdiń jastarǵa úlgi bola alady.
Ońtústikte baqytyn qazaq jerinen tapqan 500 myńǵa jýyq ózbek dıasporasy turady. 143 mektepte ózbek ultynyń ókilderi óz ana tilderinde dáris alady. Onyń ishinde 86-sy qazaq-ózbek jáne orys-ózbek aralas mektepteri. Al 57 mektep taza ózbek tilinde shákirtterge bilim beredi. Al óńirdegi ózbek mádenı ortalyǵynyń oblys qalalary men aýdandarynda 13 fılıaly jumys isteıdi.
– Biz Qazaqstandy óz Otanymyz dep tanımyz, – deıdi oblystyq «О́zbek» mádenı ortalyǵy tóraǵasynyń orynbasary Gýlı Rano Rasýlova. – Qazaqta «ózbek – óz aǵam» degen jaqsy naqyl bar. Iаǵnı, jaqsylyǵymyz ben qýanyshtarymyz ortaq halyqtarymyz. Bizdiń maqsat eki el arasyndaǵy rýhanı-mádenı jańǵyrýdy ári qaraı jalǵastyrý bolmaq.
Baqtııar TAIJAN,
«Egemen Qazaqstan»
Ońtústik Qazaqstan oblysy
