Osy oraıda oblysta 5 týrıstik baǵyt ashylmaqshy. Sheteldikter nazaryna «Pavlodar – Ertis jaǵasyndaǵy qala», «Baıanaýyl ańyzdary – 1», «Baıanaýyl ańyzdary – 2», «Shaldaı ormanyna saıahat» jáne «Ertis-Baıan óńiri» degen marshrýttar usynylmaq. Bul baǵyttarda týrıster Baıanaýyldyń Jasybaı, Sabyndykól kólderi, Máshhúr Júsip kesenesi, Ǵabdulýahıt haziret kesenesi, «Qaz qonaq» eskertkishteri bar. Negizgi marshrýttar óńirdiń Baıanaýyl, Lebıaji, Sharbaqty aýdandarynyń jáne Pavlodar men Ekibastuz qalalarynyń aýmaǵyna arnalýy kerek. Osy týrıstik marshrýttardy, saıahattaý baǵytyna engen ár nysandy naqty tekserip baryp, kórmeniń arnaıy komıssııasy ruqsat bermek. О́ıtkeni, erekshe baılyǵy bar Baıanaýyldyń Qyzyltaý memlekettik zoologııalyq qoryǵyn kózdiń qarashyǵyndaı qorǵaý – mindet. Týrıster barmaqshy bolǵan kelesi baǵyt Ǵabdýlýahıt haziret kesenesi «Ertis ormany» memlekettik tabıǵı orman rezervaty Shaldaı fılıaly aýmaǵynda qalyń qaraǵaıly aǵashtar arasynda ornalasqan.
Qazir týrısterge arnap Jasybaı demalys aımaǵy, Qońyr Áýlıe úńgiri, Kempirtas, Toraıǵyr kóli, Sabyndykól sekildi 13 týrıstik baǵyttar jasalynýda. Ásem tabıǵatpen tanystyrý maqsatynda bıyl týrıster tuńǵysh ret atqa minip aralaıdy. Aınala kıiz úıler toly etno-aýyldar qurylady. Aýdan ákimdigi de týrısterdi qarsy alamyz dep Jasybaı, Sabyndykól, Toraıǵyr kólderiniń jaǵalaýyn jańalap, aýdan ortalyǵy Baıanaýyl men Toraıǵyr aýylynda jóndeý, jańǵyrtý jumystaryn júrgizýde. Sondaı-aq, týrıster Astana – Qaraǵandy – Baıanaýyl baǵytyndaǵy áýe jolymen ushyp kelý úshin Sabyndykóldiń jaǵalaýyna jaqyn jerden ushaq qonýǵa yńǵaıly shaǵyn aerodrom salynýda.
EKSPO-2017 kórmesi aıasynda týrısterge qyzmet kórsetetin ınspektorlar, ormanshylar, ınjenerler, ekologtardan quralǵan 160 adam Baıanaýyl óńiri jaıly aqparatpen qamtylyp, bilimin jetildirýde. Baıanaýyldyń tabıǵı ereksheligi, batyrlar men bı-sheshender, ǵalymdar men aqyn-jazýshylar týraly, týrıstik marshýrttar baratyn tarıhı-mádenı eskertkishter men jer-sý ataýlarynyń mán-maǵynalary jaıly aqpan aıynan bastap tanymdyq sabaq ótip jatyr.
Farıda Byqaı,
«Egemen Qazaqstan»
Pavlodar oblysy
