Qazaq ulttyq agrarlyq ýnıversıtetinde 2004 jyldan beri «Oljas Súleımenov atyndaǵy Áleýmettik-gýmanıtarlyq bilim berý jáne tárbıe ınstıtýty» jumys istep keledi. Osynda oqıtyn stýdenttermen jıi kezdesip, ártúrli sharalarǵa qatysyp turatyn Oljas Omarulynyń ádebıet pen mádenıet, rýhanııat pen beıbitshilik máselesi, elimizdiń ekologııalyq problemalary jáne joǵary oqý oryndarynyń halyqaralyq bilim keńistigine kirýi tóńiregindegi paıymdaýlary bylaıǵy jurt úshin qol jete bermeıtin dúnıe ekeni anyq. Ýnıversıtet rektory, UǴA vıse-prezıdenti, akademık Tilektes Espolov kezdesýde: «Jastardyń zamanǵa saı, álemdik deńgeıdegi bilim men ǵylymdy ıgerýine, rýhanı bıikke kóterilýine barynsha jaǵdaı jasap otyrmyz. Sondyqtan, ýnıversıtet jastaryn Oljas aqynnyń rýhynda, onyń zor tulǵasy men azamattyq, adamı qasıetteri úlgisinde tárbıeleýdi tańdadyq. Bul baǵyttaǵy júıeli jumystarymyz óz jemisin berip keledi», dedi.
«Oljas jáne jastar» taqyrybynda ótken poezııa festıvalinde aqynnyń óleńderi oqylyp, shyǵarmashylyǵy negizinde kórinister qoıyldy. Stýdentter óz kezeginde aqynǵa suraq qoıyp, suhbat qurýǵa da múmkindik aldy.
Poezııa keshinen 8 jasar qyzdy pedofılden qutqaryp alǵan oqýshy Tımýrbek Jamaladdınovti kezdestirdik. Sóıtsek, Bilim jáne ǵylym mınıstrligi arnaıy taǵaıyndaǵan JOO grantyna osy QazUAÝ-dy tańdapty. «Oljas jáne jastar» festıvaline aqynmen birge qonaq retinde qatysqan 11-synyp oqýshysy aqynnyń óz qolynan syılyq aldy.
Sondaı-aq, 19-21 mamyr aralyǵynda ýnıversıtettiń úlken sport kesheninde ardagerler arasynda voleıboldan dástúrli «Oljas Súleımenov júldesi» týrnıri ótedi. Aqynnyń ózi de oınaıtyn bul jarysqa О́zbekstan, Qyrǵyzstan elderiniń komandalarymen qatar, Taraz, Taldyqorǵan, Shymkent, Qyzylorda qalalary, Eýrazııa tehnologııalyq ýnıversıteti men Qazaq ulttyq agrarlyq ýnıversıtetiniń komandalary qatysady.
Almas NÚSIP,
«Egemen Qazaqstan»
ALMATY
