Oblys prokýrory Ǵalymjan Toǵyzbaev jetekshilik etetin 45 adamnan turatyn top jumysyn Jylyoı aýdanynan bastady. Atalǵan top Maqat, Inder jáne Mahambet aýdandarynda da bolyp, 14 myńnan astam halyqty qamtyǵan 182 shara ótkizdi.
Top densaýlyq saqtaý, bilim berý, eńbek jáne áleýmettik qorǵaý salalary boıynsha keń aýqymdy aqparattyq-túsindirý jumystaryn júrgizdi. Ásirese, ekstremızm men terrorızmge qarsy kúres baǵytynda dinge aıryqsha mańyz berildi. Osyndaı sharalardyń nátıjesinde 631 adamǵa medısınalyq kómek kórsetildi. Onyń ishinde 250 naýqasqa dıagnoz qoıylyp, em taǵaıyndaldy.
«Bos jumys orny jármeńkesi» sharasy aıasynda 53 adam (onyń ekeýi múgedek) jumysqa ornalasty. Sonymen qatar, 200-den astam aýdan turǵyny tú-
ıindemesin (rezıýmesin) tapsyryp, kelisimnen ótti.
Tabysty bıznes – aımaqtyń, jalpy elimizdiń ekonomıkalyq turǵyda damýynyń negizgi ózegi. Atalǵan top bıznestiń túrleri, olardy qarjylaı jáne memleket tarapynan kórsetiletin qoldaýdy túsindirý maqsatynda júıeli jumys jasaýda. Bıznes bastamalar týraly aqparattar aýyl ákimderine jetkizilýde, olar oqytylyp jatyr. Osyndaı keshendi sharalardyń ıgi nátıjesi baıqalady. 22 kásipkerge memlekettik organdardyń tarapynan qoldaý kórsetildi.
Máselen, Jylyoı aýdanynyń turǵynyna bıznesin damytý úshin qaıtarymsyz negizde tigin jabdyǵy berildi. Kásipkerlikke kedergi keltiretin qıyndyqtar (nesıe berý, biliktilikti arttyrý, bıznes negizi, t.b.), ózge de máseleler boıynsha qordalanǵan problemalardy arnaıy shtab zerdeleıdi.
Vedomstvoaralyq jumysshy toby aımaqtaǵy jaǵdaıǵa saraptama jasaıdy. Ǵalamtor keńistigine monıtorıng júrgizedi. Dinı baǵyttaǵy beınerolıkterdi qaladaǵy LED ekrandarda, aýrýhanalarda, turǵyndarǵa qyzmet kórsetý ortalyqtarynda, saýda ortalyqtary men halyq kóp jınalatyn basqa da jerlerde keńinen kórsetedi.
Áleýmettik jelilerge monıtorıng júrgizý barysynda dinı sarapshylardyń qorytyndysymen mazmuny eldiń Ata Zańyna, Qazaqstannyń ózge zańdary men quqyqtyq-normatıvtik aktilerge qaıshy keletin 70-ten astam aýdıojazba anyqtaldy. Joǵaryda kórsetilgen aýdıojazbany buǵattaý boıynsha tıisti mınıstrlikke usynys joldandy.
«Prokýrordyń 100 keńesi» jobasyna sáıkes, turǵyndarǵa terakt qaýpi tóngende jáne ol oryn alǵan jaǵdaıda kimge habarlaý qajettigi, syn saǵatta ózin jáne jaqyn adamdaryn qutqarýǵa áreket etý sharalary túsindirildi. Al teologtar radıkaldy ıdeologııanyń qaýpi, teris aǵymdardyń negizgi ózgeshelikteri, keltiretin zardaptary týraly túsinik jumystaryn júrgizdi. Lańkestik turǵydan osal nysandardyń (mektep, vokzal, aýrýhana, stadıon, t.b.) qyzmetkerlerine jattyǵý dabyly kezindegi áreketteri oqytylyp, úıretildi. Maqsatty jumystar odan ári jalǵasa beredi.
Arshat TAITÝLLIN,
Atyraý oblystyq prokýratýrasynyń basqarma bastyǵy
