Qoly ashyqqa qoshemet kórsetildi

Elordada Táýelsizdiktiń 25 jyldyǵyna oraı, elimizdiń atymtaı jomarttaryna arnalǵan «Qaıyrymdylyq kerýeni» II forýmy ótti. Qazaqstan halqy Assambleıasynyń muryndyq bolýymen uıymdastyrylǵan shara aıasynda «Qaıyrymdy el-2017» jalpyulttyq aksııasynyń bastalǵany da jarııa etildi. Qazaqstan halqy Assambleıasy Tór­aǵasynyń orynbasary E.Toǵjanov pen Parlament Májilisi Tóraǵasynyń orynbasary V.Bojko bastaǵan bir top Májilis jáne máslıhat depýtattary, mesenattar men memlekettik organdar jáne úkimettik emes uıymdar, etnomádenı birlestiktiń ókilderi qatysqan saltanatty jıynda jyl boıy óziniń jomarttyǵymen ózgege úlgi bolyp, qalyń eldiń alǵysyn arqalaǵan azamattar marapattaldy. Saltanatty jıyndy ashqan QHA Tóraǵasynyń orynbasary Eraly Toǵjanov. Memleket basshysy N.Nazarbaev pen kúlli Qazaqstan halqynyń atynan qaıyrymdy jandarǵa zor alǵys aıtyp, arnaıy atalymdar boıynsha syılyqtar tabys etti. «Elbasymyz Nursultan Ábishulynyń bastamasymen qurylǵan Qazaqstan halqy Assambleıasy búgingi tańda ulttar arasyndaǵy tatýlyqty saqtap qana qoımaı, meıirimge bóleıtin baýyrmaldyǵymyzdy arttyrý maqsatynda arnaıy aksııa jarııalaǵan bolatyn. Qaıyrymdylyǵymen kómekke muqtaj jandarǵa qol ushyn sozý arqyly Qazaqstan halqynyń yntymaǵy jarasyp, berekesi arta tústi. Oǵan qomaqty úles qosqandaryńyz úshin ózderińizge alǵysymyz sheksiz», dedi E.Toǵjanov. Odan keıin sóz alǵan Májilis Tóraǵasynyń orynbasary Vladımır Bojko aǵymdaǵy jyl boıy respýblıka kóleminde júrgizilgen aksııalar aıasynda elimizdiń túkpir-túkpirindegi muqtaj jandarǵa kórsetilgen kómek kólemi 40 mlrd teńgeden asyp túskendigin atap ótti. Onyń aıtýynsha, mundaı kómektiń quramynda qarjylaı, materıaldyq nemese qyzmettik qolqabys etýdiń san túri bar. Qaıyrymdylyq sharasyna qatysyp, kópshiliktiń yqylasyna bólengenderdiń qatarynda eki dúrkin Olımpıada chempıony, dańqty ziltemirshi Ilıa Ilın de boldy. Ol osy kezge deıin jasap kelgen túrli baǵyttaǵy qaıyrymdylyq sharalaryn áli de bolsa jalǵastyra túsetindigin aıtty. «Men úshin elimizdiń árbir azamatynyń jany jaısań, qoly ashyq. Tipti, eń bolmaǵanda jaqyn adamdaryńa qýanysh syılap, jaqsylyq jasaýdyń ózi zor baqyt. Ásirese, balany qýanyshqa keneltip, júregińdi eljirete alsań, onyń ózi de bir baqyt. Shama-sharqymyzdyń kelgeninshe osy kezge deıin búldirshinderdi qýantýǵa kúsh jumsap keldik. Budan bylaı da osy áreketimizdi jalǵastyratyn bolamyz», dedi I.Ilın. Aıtýly keshke Jezdi óńirden kelgen mesenat Bekzat Altynbekov te oń qolymnyń bergenin, sol qolym bilmese eken degen nıetin bildirdi. Sondyqtan da bolar, ol birneshe jyldan beri jasap júrgen qaıyrymdylyq áreketteriniń esebinen jańylysady. «Jalpy, ózim kóp balaly otbasynda dúnıege kelgenmin. Jesir áıeldiń jetinshi perzenti bolyp ósip, jetilgendikten ómir meni jastaıymnan-aq shyńdady. Joqshylyqty kóp kórgenimmen, qoldyń kiri sanalatyn qý dúnıe meniń júregimdi tarylta qoımady. Sondyqtan da bolar, qal-qaderimizshe turmysy turalap, jaǵdaıy kelisińkiremeı júrgen jandarǵa barynsha kómek qolyn sozýǵa umtylyp jatamyz. Bul adamdar arasyndaǵy meıirim, shapaǵattyń shýaǵyn shashady emes pe?», deıdi Bekzat Altynbekov. Aıta keteıik, júzge jýyq qoly ashyq jomart jandar marapattalǵan bul jıynda «Kóz qýantqan biregeı týyndylar» taqyrybynda sýret kórmesi de uıymdastyryldy. Kórmede bashpaıymen sýret salyp álemge tanylǵan qostanaılyq sýretshi qyz Maıa Demeevanyń týyndylary kópshilik nazaryna usynyldy. Nurlybek DOSYBAI, «Egemen Qazaqstan» Sýretti túsirgen Orynbaı BALMURAT, «Egemen Qazaqstan»