Aqparat alý qoljetimdi bolýy tıis

«Nur Otan» partııasynyń janyndaǵy Quqyqtyq keńestiń keńeıtilgen otyrysy ótip, onda «Aqparatqa qoljetimdilik týraly», «Qoǵamdyq keńester týraly» jáne «Sybaılas jemqorlyqqa qarsy is-qımyl týraly» zańdardy iske asyrýdyń birinshi jylynyń alǵashqy nátıjeleri talqylandy. Májilistiń Zańnama jáne sot-quqyqtyq reforma komıtetiniń tóraǵasy, «Nur Otan» partııasy janyn­daǵy Quqyqtyq keńes tór­aǵasy Nurlan Ábdirov jetek­shilik etken basqosýda «Aqparatqa qoljetimdilik týraly» Zańnyń qyzmeti jan-jaqty saralanyp, osy zań aıasynda «Modeldi alańqaı» qyz­metin iske qosý qajettiligi de sóz boldy. Májilis depýtattary men «Nur Otan» partııasynyń janyndaǵy Quqyqtyq keńestiń músheleri, memlekettik organdardyń ókilderi, Qazaqstandaǵy BUU DB, EQYU-nyń Astanadaǵy baǵdarlamalar keńsesi, Gýmanıtarlyq zertteýler men jobalar ınstıtýty, Astana, Pavlodar, О́skemen qalalarynyń jáne Qaraǵandy oblysynyń Qoǵamdyq keńesteriniń ókilderi qatysqan jıynda Aqparat jáne kommýnıkasııalar vıse-mınıstri Alan Ájibaev qoldanysqa engen zańnyń alǵashqy jylynyń aldyn ala qorytyndylary jóninde baıandama jasady. «100 naqty qadam» Ult jos­paryn iske asyrýdyń negizgi bóligin quraıtyn osy zańdardy múddeli tarap­tardyń keń otyrysynda tal­qy­­laýdyń mańyzdylyǵyna toq­tal­­ǵan vıse-mınıstr, búgin­ge deıin oryndalǵan sharýa­lar­dyń bir­qataryn atap ótti. «Azamat­tardyń aqparatqa qoljetimdiligin qamtamasyz etý maqsatynda mı­nıstr­lik aǵymdaǵy jylda halyq­ara­lyq uıymdarmen birlese oty­ryp, aımaqtardaǵy BAQ ókil­deri úshin semınar-keńesterdi óte sátti ótkizdi. Sondaı-aq, normatıvtik-quqyqtyq aktilerdiń bazasy da jasaqtaldy. Sonyń negizinde aza­mat­tardyń aryz-shaǵym, ótinish-tilekteriniń 73 paıyzyna der kezin­de jaýap berildi», dedi Alan Ǵazız­uly. Sondaı-aq, ol mınıstrlik soń­ǵy kezderi Úkimet otyrysyn on­laın-translıasııa arqyly ótkizýdi bel­sendi qolǵa alǵanyn tilge tıek etti. Negizgi baıandamadan soń sóz alǵandardyń keıbiri mı­nıstr­lik tarapynan jaqsy kórset­kishter bolǵanymen, aqparatqa qoljetimdilikti qamtamasyz etýde túıindi máseleler bar ekendigin aı­typ qalyp jatty. Jalpy, aq­pa­ratqa qol jetkizýdiń bir emes, bir­neshe ádis-tásili bar desek te, onyń barlyǵy qalypty jaǵdaıda emes ekendigi belgili boldy. Máse­len, osy kúnderi memlekettik or­gan­nan telefon shalý, jazbasha óti­nish jazý, elektrondy baılanys qural­dary arqyly nemese «Elektrondy úki­mettiń» arnaıy tórt portaly ar­qy­ly aqparattar alýǵa bolady eken. Alaıda, qazir bul qyzmetterdi saralap shyǵyp, olardy áli de bolsa jetildirý qajet degen oıǵa keldik. Sebebi, joǵaryda atalǵan aqparat alýdyń 5-6 ádisiniń ishindegi telefon shalý arqyly qandaı da bir málimetke qol jetkizý tetigi jumys istemeı turǵanyn baıqaýǵa bolady, dedi Májilis depýtaty Máýlen Áshimbaev. Odan keıingi sóz memlekettik organdardyń saıttary jóninde órbidi. Qazir órkenıettiń keń óris alyp, ınternettiń tilin meńgergen azamattar sany artqan kez desek te, keıbir memlekettik organdar bul máselege mán bermeıtin sekildi. О́ıtkeni, qaısybir mekemeler jeke saıty arqyly biraz saýalǵa jaýap berý múmkindigi bola tura, ony júıeli túrde shynaıy aqpa­rattarmen der kezinde qamtamasyz ete almaı otyr. Sodan keıingi bir ádis – azamattardyń arnaıy hat jazý arqyly 10-15 kún ishinde resmı jaýap alýǵa qatysty jaǵdaıdy baıandaıtyn bolsaq, bul mindettiń de údesinen shyǵyp, minsiz atqaryp otyrǵan organdar sanaýly ǵana. Mine, osydan keıin «Aqparatqa qoljetimdilik týraly» Zań tıisti deńgeıde qoldanylyp otyr dep aıtýǵa aýyz barmaıtyndaı. Aıta keteıik, aqparatqa qolje­tim­dilik zańy jurtshylyqqa kerek málimetterdi jetkizýdi qamta­ma­syz etýmen ǵana shektelmeıdi. Bul – eldegi demokratııalyq úrdis­ter­diń damýyna, sybaılas jemqor­lyqqa qarsy kúreske, memle­ket­t­ik organdardyń ashyqtyǵyn qa­lyptastyrýǵa, aza­mattar quqyǵy­nyń saqtalýyna tikeleı áser ete­tin, soǵan kómekte­se­tin tetik. Iаǵnı, osy zań­­nyń talap­tary tııanaqty oryn­­­dalý arqyly halyq arasynda mem­­­le­ket­tik bılik­tiń bedeli arta­tyn­d­y­ǵy sózsiz. Sondyqtan da bul máse­le­ge beıjaı qaraýǵa bolmaıdy. Nurlybek DOSYBAI, «Egemen Qazaqstan»