Búgin elimizdiń barlyq óńirlerindegi Nazarbaev Zııatkerlik mektepterinde ashyq esik kúni uıymdastyryldy. Bul is-shara «Uly dala eli – Táýelsizdiktiń 25 negizderi» 25 juldyzdy kúnder aıasynda ótýde.
Ashyq esik kúni júzege asqan aıtýly sharanyń biri elimizdiń 16 óńiriniń az qamtylǵan otbasylarynan 100 oqýshyǵa EKSPO-2017 kórmesine qatysýǵa múmkindik beretin sertıfıkattar jáne Astanadaǵy Nazarbaev Zııatkerlik mektepteri janyndaǵy 5 kúndik jazǵy lagerge joldama tapsyryldy. Bul aksııaǵa qajetti qarajatty Zııatkerlik mektepteriniń oqýshylary Táýelsizdiktiń 25 jyldyǵyna arnalǵan is-sharalar sheńberinde uıymdastyrylǵan qaırymdylyq jármeńkeleri men kórmeleriniń negizinde ózderi jınaǵan.
Bul kúni «egemen.kz» tilshileri Astanadaǵy fızıka-matematıka baǵytyndaǵy Nazarbaev Zııatkerlik mektebinde bolyp qaıtqan edik, onda osyndaı sertıfıkat pen joldamaǵa 5 oqýshy ıe boldy. Mekteptiń dırektory Meıram Jakenovtiń aıtýynsha, mundaı sharalar jasóspirimderdi eljandylyqqa, otansúıgishtikke tárbıeleýmen qatar, adamgershilik, qaıyrymdylyq isterge baýlıdy.
«Nazarbaev Zııatkerlik mektepteri» derbes bilim berý uıymy basqarmasy tóraıymynyń orynbasary Svetlana Ispýsınovanyń aıtýynsha bul merekeniń aıasynda ǵana ótkiziletin ótkinshi naýqandyq shara emes. Mektep oqýshylary mundaı qaıyrymdylyq jumystarǵa únemi talpynyp, ıntelektýaldy ultqa tán óreli isterge umtylystaryn kórsetip júredi. «Bul mektepterde oqyp jatqan árbir oqýshynyń jetistigi, jalpy bolmysy, egemendiktiń erkin dáninen óskindegen ór ulandary - Táýelsiz elimizdiń bolashaǵy. Olar qandaı sharaǵa qatyssa da elderine, Otandaryna degen shynaıy súıispenshiklikterin jetkizýge tyrysady. Osyndaı órenderi bar eldiń keleshegi kemel bolaryna senimdimiz. Bárimiz sol jolda eńbek etýdemiz», - deıdi Svetlana Ispýsınova.
Dál osy kúni Nazarbaev Zııatkerlik mektepterine kez kelgen oqýshy erkin kirip, onyń ǵımaratyn aralap kórýge múmkindik aldy. Elimizdegi erekshe mektepterdi aralaı júrip, STEM (hımııa, bıologııa, fızıka, ınformatıka) baǵyttary boıynsha zerthanalyq jáne zertteý tájirıbelerin kórý múmkindigi bar. Sondaı-aq, «ashyq esik» kúnine kelýshiler mekteptiń ǵylymı-zertteý jobalaryn tashalady. «Robot tehnıkasy», «Avıasııalyq modeldeý», «Qysh-qumyra óneri», «Dızaın», «Dombyra», «Horeografııa», «Shahmat» jáne t.b. úıirmeleriniń jumystarymen tanysty. Sonymen qatar, mektepishilik «Týǵan elge taǵzym», «Shańyraq», «Qazaqsha Wikipedia», «TEDx NIS», «100 kúıdiń tarıhy», «100 kitap», «Qazaqstyń 100 áni» jobalary jónindegi aqparattarmen qanyqty. Zııatkerlik mektepterinde bilim alý múmkindikteri, kanıkýlıarlyq jáne vırtýaldyq mektepterine tirkelý boıynsha oqýshylarǵa jáne ata-analarǵa arnalǵan konsýltasııalyq bekettik jumysy usynyldy. Oqýshylar úshin taǵy bir qyzyqty joba - jalpy orta jáne zııatkerlik mektepterdiń oqýshylarynyń qatysýymen «Alǵa, Qazaqstan!» bı fleshmoby uıymdastyryldy.
Dınara BITIKOVA,
«Egemen Qazaqstan»
