Elbasy Nursultan Nazarbaev «Embimunaıgaz» AQ qyzmetkerleriniń eńbekterin joǵary baǵalady. Memleket basshysy Atyraýǵa sapary barysynda baıyrǵy munaı kompanııasynyń úsh ókilin memlekettik nagradalarmen marapattady.
– Qazaqstan Respýblıkasy Táýelsizdiginiń 25 jyldyǵy qarsańynda oblys pen elimizdiń ıgiligi úshin eńbek etip jatqan jandardy atap ótkim keledi, – dedi marapattardy tabystaǵan Elbasy.
Marapatqa «Embimunaıgaz» AQ bas dırektorynyń birinshi orynbasary Qurmanǵazy Esqazıev, «Dossormunaıgaz» MGО́B munaı jáne gaz óndirý jónindegi operatory Jaqsygereı Qubashev, «Dossormunaıgaz» MGО́B qabat qysymyn ustaý sheberi Qarlyǵa Altynalıeva ıe boldy.
Munaı-gaz salasyn damytýǵa qosqan zor úlesi úshin kompanııa basshysynyń birinshi orynbasary Qurmanǵazy Esqazıev «Qurmet» ordenimen marapattaldy. Geologııa-mıneralogııa ǵylymdarynyń kandıdaty, ǵylym men tehnıka salasyndaǵy ál-Farabı atyndaǵy Qazaqstan Respýblıkasy Memlekettik syılyǵynyń laýreaty Qurmanǵazy Esqazıev munaı salasynda 30 jyldan beri qyzmet atqaryp keledi. Eńbek jolyn Balyqshy barlaý burǵylaý basqarmasynda uńǵymany sementteý jónindegi operatorlyqtan bastap, sodan keıin geolog bolyp jalǵastyrdy. Arada bes jyl ótken soń Atyraý uńǵymalardy kúrdeli jóndeý jáne munaı qabattarynyń ónimdiligin arttyrý basqarmasynyń bas geology bolyp taǵaıyndaldy. Ár jyldary «Embimunaıgaz» AAQ, «QazMunaıGaz» BО́» AQ jáne «QazMunaıGaz» UK» AQ qurylymdarynda basshy laýazymdaryn atqardy. «QazMunaıGaz» BО́» AQ bas dırektory, «Embimunaıgaz» AQ basqarma tóraǵasynyń qyzmetin atqaratyn bas dırektordyń birinshi orynbasary.
Q.Esqazıevtyń jańa tehnologııalardy engizý jáne óndiris tıimdiligin arttyrý boıynsha mol tájirıbesi bar. Onyń basshylyq etýimen kompanııada 2015 jyly jańa jobalar: ÝAZ kenishinde «Intellektýaldy ken orny», dýaldy oqytý júıesin engizý jónindegi qanatqaqty joba oıdaǵydaı júzege asty. Qurmanǵazy Orynǵazyuly Qazaqstan ken oryndary, onyń ishinde Teńiz, Jetibaı, Jańajol, Qalamqas, Isataı jáne basqa kenishter boıynsha geologııalyq-tehnıkalyq taldaý jasaý jóninde dúnıe júziniń iri munaı-gaz kompanııalarymen jasalǵan kelissózderge belsene qatysty. Aıta ketý kerek, Qashaǵan kenishi boıynsha da eńbegi zor.
Ol sonymen qatar, Qazaqstan Respýblıkasy jer qoınaýyn qurmetti barlaýshysy, Atyraý oblysynyń qurmetti azamaty atandy.
Memleketimiz sondaı-aq, «Dossormunaıgaz» MGО́B munaı jáne gaz óndirý jónindegi operatory Jaqsygereı Qubashevtyń eńbegin joǵary baǵalap, 3-dárejeli «Eńbek Dańqy» ordenimen marapattady. J.Qubashev munaı salasynda 40 jyldan beri jumys istep keledi. Eńbek jolyn 1973 jyly «Dossorneft» MGО́B munaı óndirý jónindegi operatory bolyp bastaǵan. 1977 jyldan kúni búginge deıin Qarsaq kenishinde munaı jáne gaz óndirý sehynda operator bolyp eńbek etedi.
EMG tarıhynda osynaý aýyr da qıyn jumysta áriptes er adamdarmen básekege túsken munaıshy áıelder de az emes. Osyndaı eńbegi úshin Qarlyǵa Altynalıeva 3-dárejeli «Eńbek Dańqy» ordenimen marapattaldy. Ol munaı salasyna 34 jylyn arnaǵan. 1977 jyly «Dossorneft» MGО́B-ke ólsheýshi bolyp ornalasty. 1980 jyldan bastap aýdandyq ınjenerlik-tehnologııalyq qyzmette uńǵymalardy zertteý boıynsha operator, uńǵymalardy zertteý operatory, «Dossorneft» MGО́B qabat qysymyn ustaýshy operator, «Dossormunaıgaz» MGО́B qabattyq qysymdy ustaý sheberi bolyp eńbek etýde. Atqarǵan eńbegi úshin ol qurmet gramotalarymen jáne tósbelgilermen marapattaldy.
Budan kóp jyl buryn basty korporatıvtik qundylyq – adam resýrstary dep málimdegen «Embimunaıgaz» kompanııasy óziniń durys baǵytty tańdaǵanyna kóz jetkizdi. EMG-degi maıtalman mamandar alǵan marapat – bul munaı óndirý tarıhynda ańyzǵa aınalǵan búkil ujymnyń marapaty.
Álııa IMAShEVA
