Bir kúnde úsh áleýmettik nysan ashyldy

El Táýelsizdiginiń 25 jyldyǵy qarsańynda shyǵysqazaqstandyqtardyń ıgiligine kóptegen áleýmettik nysandar paıdalanýǵa berilýde. Árıne, basym bóligi – mektepter men balabaqshalar jáne emdeý mekemeleri syndy áleýmettik nysandar. Sonyń ishinde Semeı qalasyndaǵy Nazarbaev zııatkerlik mektebiniń jańa ǵımaraty men Sport akademııasynyń ashylýyn, sondaı-aq О́skemen qalasyndaǵy múmkindigi shekteýli balalarǵa arnalǵan "Aqnıet" mektep-ınternatynyń paıdalanýǵa berilýin aıryqsha atap ótýge bolady.

Nazarbaev zııatkerlik mektebi

Semeıde fızıka-matematıka baǵytyndaǵy Nazarbaev zııatkerlik mektebiniń jańa ǵımaraty paıdalanýǵa berildi. Barlyǵy 720 oqýshyǵa eseptelgen bilim ordasynda balalardyń shyǵarmashylyq jáne zertteýshilik múmkindikterin damytýǵa, úshtildi orta qalyptastyrýǵa, synı jáne zamanaýı oılaýǵa mashyqtandyratyn jaǵdaıdyń barlyǵy jasalyp otyr. Memleket basshysynyń bastamasymen dúnıege kelgen biregeı bilim berý jobasyna tıesili jańa nysannyń Táýelsizdik merekesi qarsańynda saltanatty túrde ashylýy semeılikterdiń qýanyshyn eseleı tústi. "Qaraǵaıly" yqshamaýdanynda ornalasqan mekteptiń qurylysy 2 jarym jyl boıy júrgizildi. Jalpy aýdany 23 myń sharshy metrden asatyn úsh qabatty ǵımarattyń sáýleti kóz tartarlyqtaı kórikti. Bul jobanyń ereksheligi – aýyldyq okrýgterden kelgen talantty balalarǵa arnalǵan jatyn oryn oqý korpýsymen qosylǵan. Búginde mektepte oblystyń túkpir-túkpirinen kelgen 645 bala bilim alady. Oqýshylardyń múmkindigin damytý maqsatynda hımııa jáne fızıka pánderiniń zerthanalary, nanotehnologııa, bıotehnologııa, robot tehnıkasy jáne óner kabınetteri, kitaphana, májilis zaly, deneshynyqtyrý-sport beldeýi syndy sońǵy úlgidegi zamanaýı tehnıkalarmen jaraqtandyrylǵan aýdıtorııalar bar. Mektep dırektory Baǵdan Qaıyrjanovtyń aıtýynsha, oqý úderisi Kembrıdj halyqaralyq emtıhandyq keńesimen birge jasalǵan bilim berý baǵdarlamasy boıynsha júrgiziledi. Oqytýshylar quramy "Bolashaq" baǵdarlamasy boıynsha tájirıbeden ótken 122 pedagogtan turady. Synı turǵydan jáne jańasha oılaýdy damytý úshin oqýshylar ınnovasııalyq kýrstarǵa qatysady. Oqýshylardy halyqaralyq emtıhandar tapsyrýǵa daıyndaýdy kózdeıtindikten basynan bastap «IELTS», «SET» elektıvti kýrstaryn oqytady.

Sport akademııasy

2015 jyldyń kúzinde Semeıde 200 oryndyq sport ınternaty men ashana jáne kúres zaly ǵımaratynyń qurylysy bastalǵan bolatyn. Bul nysan shahardaǵy №1 balalar men jasóspirimder sport mektebiniń qasynan boı kóterdi. Qurylysty aıaqtar kezde barlyq úsh nysandy qosyp, sport akademııasyn qurý týraly sheshim qabyldandy. Mine, osy jańa nysannyń ashylýyna óńir basshysy Danıal Ahmetov, Olımpıada chempıony O.Rypakova jáne sportty qoldaýǵa ázir qala turǵyndary qatysty. Akademııanyń negizgi qyzmeti óńirdiń barlyq aýdandary men qalalarynan daryndy sportshylardy iriktep, olardy dzıýdo, sambo, grek-rım jáne erkin kúres boıynsha daıarlaý. Sondaı-aq buǵan deıin bolǵan 11 seksııa da óz jumysyn jalǵastyrady. Irikteýden ótken balalar barlyq jaǵdaı jasalǵan ınternatta tegin turady. Jas sportshylar qajetti sporttyq jabdyqtarmen, quraldarmen, oqýlyqtarmen, tegin tamaqpen jáne issapar shyǵyndarymen qamtamasyz etilgen. Qazirgi kezde respýblıkalyq jáne oblystyq jarystardyń jeńimpazdary men júldegerlerinen alǵashqy shákirtter iriktelip alyndy. Balalarǵa oqý-jattyǵý jumystaryn júrgizýge halyqaralyq dárejedegi sportshylardy daıarlaǵan Reseı, Mońǵolııa jáne Ázerbaıjan elderiniń joǵary sanatty mamandary shaqyryldy. Akademııa jetekshileriniń aıtýynsha, irikteý kezeńi oblys aýmaǵyndaǵy 10-18 jas aralyǵyndaǵy oqýshylar arasynda júrgiziledi. Ár oqýshynyń sporttyq jetistiginiń bolýy qatań qadaǵalanady. Iаǵnı, úmitker respýblıkalyq jáne oblystyq jarys jeńimpazy nemese júldegeri bolýy tıis. Internatta olımıpıadalyq sport túrlerin daıarlaýǵa basymdyq berilgendikten bul mindetti. Aıta ketý kerek, Táýelsizdik jyldarynda óńirde sportpen jáne dene shynyqtyrýmen júıeli túrde shuǵyldanýshylar sany 30,3 paıyzǵa deıin artyp, 420 myńnan astam adamdy qurap otyr. Oblys aýmaǵynda 3149 sporttyq qurylym jumys istese, onyń ishinde 30 dene-shynyqtyrý-saýyqtyrý kesheni bar.

"Aqnıet" mektebi

Endi óńirdiń qalalary men aýdandarynan kelgen múmkindigi shekteýli 100 bala "Aqnıet" ınternatynda turyp, emdelip, oqı alady. Iаǵnı, kórý, estý jáne tirek-qımyl júıesinde kináraty bar balalar О́skemen qalasynyń atalǵan mekemege jaqyn ornalasqan mektepteri men kolledjderinde bilim almaq. Olar oqýdy bitirgen sátte belgili bir mamandyqqa ıe bolady. Jańa nysannyń elimizde balamasy joq. Byltyr kúzde qurylysy bastalǵan áleýmettik mekemeniń ashylýyna qatysqan óńir basshysy D.Ahmetov: – Biz mektep-ınternatty asha otyryp, Memleket basshysynyń barlyq balalardyń múmkindigi teń bolýy tıis degen tapsyrmasyn oryndap otyrmyz. Bul nysannyń arqasynda aıryqsha qaraýdy qajet etetin balalar óz qatarlarymen birge mektepterde bilim alady. Olardy qatar qurbylary qoldaıtynyna senemin. Sonymen birge ınternat qabyrǵasynda densaýlyǵyn túzeýine múmkindik bar. О́ıtkeni bul sanattaǵy balalarǵa ata-analarynyń sheksiz meıirimi men mahabbaty bolǵanyna qaramastan, olar kásibı kómek pen medısınalyq kútimdi tolyǵymen kórsete almaıtyny anyq. Mektep-ınternatta 8 mamandyq boıynsha oqytylady. Balalar qoǵamnyń ortasynda bolýy kerek. Biz keleshekte olardyń jetistikterine qýanatyn bolamyz, – dedi. Erekshe balalardyń ata-analary kópten kútken armandarynyń oryndalǵanyn aıtady. Sebebi, buǵan deıin úıge qamalyp kelgen balalar qoǵammen qarym-qatynas jasaýǵa múmkindik alyp otyr. – "Aqnıet" mektep-ınternatynyń ashylǵanyna qýanyshtymyz. О́ıtkeni, osy aradan asa alys emes №15 mektepke bara bastadyq. Qyzym aıryqsha qýanyp júr. Birtindep adamdardyń kóp shoǵyryna úırene bastady. Bul – Elbasynyń qamqorlyǵy dep bilemiz, – deıdi ata-analardyń biri Ásemgúl Kemshibaeva. Oqýshylar mektep-ınternatta logoped, tıflo-sýrdopedagog, defektolog jáne basqa da arnaıy mamandardan keshendi em alady. Balalardy sátimen áleýmettendirý ınternat qabyrǵasynda emes, jaqyn jerdegi mektepterde júrgiziledi. Bilim ordalarynyń biri tirek-qımyl júıesi buzylýynan zardap shegýshi balalardy oqytý maqsatynda arnaıy jabdyqtaldy. Al mamandyqty joǵary synypqa kelgen kezde ınternat qasyndaǵy kolledjderden alady. Keleshekte kompıýterlik modeldeý operatory, baǵdarlamashy, aýdarmashy, kitaphanashy nemese esepshi bolýy múmkin. Internattaǵy 10-11 synyp oqýshylary úshin qysqa merzimdi kásiptik kýrstar uıymdastyý josparlanǵan. Aıta ketý kerek, ınternat oqýshylary múmkindigi shekteýli jandarǵa arnalǵan halyqaralyq "Abılımpıks" qozǵalysyna qatysyp, kásibı sheberlik baıqaýlarynda baq synaıtyn bolady. Dýman ANASh, "Egemen Qazaqstan". Shyǵys Qazaqstan oblysy.