Elbasy ádebıet pen óner salasyndaǵy Memlekettik syılyqtardy tabystady

Qazaqstan Prezıdenti Nursultan Nazarbaev 2016 jylǵy ádebıet pen óner salasyndaǵy Memlekettik syılyqtardy tabys etti. Saltanatty sharada Prezıdent osy jyly Memlekettik syılyq jónindegi komıssııa 4 týyndyny iriktep alǵanyn aıtty. «Joǵary marapatqa elordamyzdaǵy «Máńgilik el» monýmentiniń avtorlary laıyq bolyp tanyldy. Astanada mundaı ǵımarattar az emes. Degenmen «Máńgilik el» maǵynasy jaǵynan da, kórkemdik jaǵynan da ózimizge de, basqalarǵa da belgili bolyp kele jatqan ǵımarat. Bul táýelsiz elimizdiń mártebesin sáýlet óneri arqyly sátti aıshyqtaıtyn týyndy dep sanaımyz», – dedi Nursultan Nazarbaev. Kelesi syılyq «Qunanbaı» fılmin túsirgen shyǵarmashylyq topqa berildi. «Kınoda uly Abaıdyń ákesi Qunanbaı taǵdyry arqyly halyq ómiriniń kúrdeli kezeńi beınelendi», – dep atap ótti Elbasy. Sondaı-aq, Memleket basshysy kezekti syılyqty belgili jazýshy Beksultan Nurjekeevke «Áı, dúnıe-aı» romany úshin tabystady. «Bul shyǵarma elimizdiń táýelsizdikke deıingi 75 jyl tarıhyn qamtıdy. 1916 jylǵy ult-azattyq kóterilis kezinde Jetisý halqy basynan ótkizgen qıly kezeń romannyń ózegine aınalǵan. Búkil qazaq halqynyń basynan ótken zulmattyń kórinisi bolyp sanalady», – dedi Prezıdent. Munan soń Elbasy 4-shi Memlekettik syılyqty Qazaqstan Respýblıkasy Táýelsizdiginiń 25 jyldyǵyna arnalǵan «Táýelsizdikke tartý» jumystar sıkli úshin sýretshi Kamıl Mýllashevqa berdi.