Túrkmender Irak premerin sotqa berdi

21 qazan kúni Iraktyń Kırkýk aımaǵynyń Dakýk aýdanynda jasalǵan áýe soqqysy nátıjesinde qaıtys bolǵan túrkmenderdiń týystary Iraktyń premer-mınıstri Haıdar ál-Abadıdi jumysyna selqos qarady dep aıyptap, sotqa berýde, dep habarlaıdy Haberler basylymy. "Oqıǵanyń bolǵanyna bir jarym aı ótip ketkenine qaramastan, úkimet máselege qatysty áli de kóńilge qonymdy málimdeme jasamaı otyr", - deıdi atalǵan oqıǵa kesirinen ápkesi men eki jıeninen aıyrylǵan Haıdar Ahmet. Onyń aıtýynsha, túrkmender Irak konstıtýsııasyna saı, úkimet basshysyn nemquraıly jumysy úshin aıyptap, sotqa berýde. "Kerek bolsa biz halyqaralyq sotqa shaǵym túsiremiz", - deıdi Haıdar Ahmet. Esterińizge sala keteıik, 21 qazan kúni memlekettik menshikte joq ushaq Iraktyń Dakýk qalasynda áýe soqqysyn jasap, 11 áıeldiń kóz jumyp, 45 adamnyń jaralanýyna sep bolǵan edi.