Qyzylordada júıke aýrýlary ınternaty ashyldy

13 jeltoqsanda Qyzylorda qalasyna qarasty Talsýat aýylynda júıke aýrýlary ınternaty ashyldy. Qyzylorda oblysynyń ákimi Qyrymbek Kósherbaev jáne QR Ulttyq ekonomıka vıse-mınıstri Aıdar Áriphanov ınternattyń ashylý saltanatyna qatysty. - 2008 jyly oblys ortalyǵynda múgedek jandar men júıke naýqasy bar azamattarǵa  arnalǵan zamanaýı úlgidegi 3 ortalyqtyń qurylysy bastalǵan bolatyn. Sonyń ekeýi 2012 jyly halyq ıgiligine berildi. Onyń biri – respýblıkada teńdesi joq múgedekterdi ońaltý  ortalyǵy. Al, búgingi ashylǵaly turǵan 300 oryndyq júıke aýrýlary ınternatynyń qurylysy 2011 jyly toqtap qalǵan edi. Bıyl oblystyń jer qoınaýyn paıdalanýshy uıymdarynyń qarjysy esebinen, ıaǵnı demeýshilik kómek arqyly ǵımarattyń tolyq  aıaqtalýyn qamtamasyz ettik,- dedi oblys ákimi. Internattyń ashylý saltanatynda joba demeýshileriniń atynan – «QazMunaıGaz» Barlaý О́ndirý AQ-nyń bas dırektory Qurmanǵazy Isqazıev jáne Qyzylorda oblystyq máslıhatynyń depýtaty, oblys ákiminiń múgedekter máselesi boıynsha keńesshisi Nurmurat Ermanov sóz sóıledi. Esterińizge sala keteıik, Talsýattaǵy júıke aýrýlary ınternaty sot prosesiniń sozylyp ketýine baılanysty qurylysy keshikken sońǵy nysan. Buryn naýqastyń osy túrine shaldyqqandar qalalyq týberkýlezge qarsy aýrýhanada emdelýge májbúr boldy. Jańa ınternatta  jattyǵý zaly, sýmen emdelý bólimi, aǵash óńdeý sheberhanasy, tigin sehy jáne májilis zaly bar.