Táýelsizdik jyldary elimizde 13 tennıs ortalyǵy ashyldy

Táýelsizdik jyldary elimizde 13 tennıs ortalyǵy ashyldy. Bul týraly tennısten Qazaqstan quramasynyń kapıtany Dıas Dosqaraev málimdedi, dep habarlady baq.kz tilshisi. «Elimiz sanaýly kúnderden keıin Táýelsizdiktiń 25 jyldyǵyn toılaǵaly otyr. Bul ataýly mereke. Osy 25 jyldyń ishinde kóptegen sport keshenderi ashyldy. Munyń bári Elbasynyń sportqa degen qamqorlyǵynyń arqasynda júzege asyp jatyr. Men tennıstiń arqasynda álemniń barlyq elinde bolyp shyqtym. Qazaqstanda da bul sporttyń damýyna qolaıly múmkindikter bar. Úlken tennıske qyzyǵatyndar kóp. 2012 jyly alǵash ret Qazaqstan tennısshileri Olımpıada oıyndaryna qatysýǵa lısenzııa jeńip aldy. Biz ázirge júlde alýdy armandaı almaımyz. Biraq tórt jyldyń basty dodasyna qatysýdyń ózi úlken jetistik dep sanaımyn», – dedi Dıas Dosqaraev. Onyń aıtýynsha, sońǵy 10 jyldyń ishinde 13 aımaqta álemdik standarttarǵa sáıkes tennıs ortalyǵy ashyldy. «Tek Soltústik Qazaqstan oblysynda ǵana ashylǵan joq. Kelesi jyly qurylysy bastalady. Jaqynda Táýelsizdiktiń 25 jyldyǵy qarsańynda Atyraýda jańa ortalyq ashyldy. Adamdar tennısti osy ýaqytqa deıin baılardyń sporty dep oılap kelgen edi. Elimizdegi eń qymbat qala Astananyń ózinde bir aıdaǵy seksııanyń quny 15 myńnan aspaıdy. Onyń qasynda jeńil atletıka, júzý, gımnastıkanyń baǵalary qymbat. Al Shymkentte 6 myń teńgeden bastalady», – dedi Qazaqstan quramasynyń kapıtany. Dıas Dosqaraev sheteldikter mundaı baǵany estigende tańǵalatynyn aıtty. О́zge elden kelgen tennısshiler, bapkerler bizdegi baǵany dollarmen eseptep kórip, arzan dep jatatyn kórinedi. Sebebi álemniń birde-bir elinde 30 dollarǵa tennıs oınaý múmkin emes.