Kól ústindegi bir tún

Tarbaǵataıdyń qarashada keletin qara sýyǵy keıbir óńirdiń qaharly qysyn da jolda qaldyrady. Ásirese, aýdannyń yrysy bolyp otyrǵan Zaısan kóliniń mańyndaǵy aýyl­dar sýyqty erte sezinedi. ...Demalys kúni bolatyn. Ákem kólden kúndegisinen erte keldi. Jel turyp, tolqyn kúsheıip ketkennen keıin qaterge bas tikkendi jón kórmepti. Keshki asqa endi otyrǵaly jatqanymyzda, onyń uıaly telefony shyryldady. Sol kezde baryp ákemizdiń kenje baýyry Talanttyń kólden jaǵaǵa shyqpaǵany týraly estidik. Birden Tóleýhan atam men Jánııa apamnyń úıine jınaldyq. Búkil aýyldyń azamattary kól jaǵalap ketti. Túni boıy alańdap, uıqy kórmeı, habarlasyp qalar dep, telefonǵa úńilýmen boldyq. Tań aǵarańdaı bastady. Áli esh habar joq. Janymyzdy shúberekke túıip, aǵamnyń amandyǵyn tileýden basqa qolymyzdan eshteńe kelmedi. «Kóp tileýi – kól» degen, aǵam aman qaldy. Bári ornyna kelip, Talant aǵam ońalǵannan keıin basynan ótken oqıǵany  aıtyp berdi. – Saǵat 4-ten keıin aý qarap bolyp, jaǵaǵa shyǵýǵa yńǵaılanǵan kezde motorym ot almaı qaldy da, sony kútip turǵandaı, alaı-dúleı jel bastaldy. Tolqyn kúsheıe tústi. Úıdiń boıyndaı tolqyn ústimnen aınalyp ótkendeı bolsa, kelesisi qaıyqty kómip ketip jatty. Qaıyqqa quıylǵan sýdy qolymdaǵy ydyspen tóge berdim, tóge berdim. Kózim úırengendiki me, tún ortasy bolsa da aınalam jaryq sııaqty kórinedi. Sýdy tógip otyryp: «Meni úıde tosyp otyrǵan áke-sheshem bar, týystarym bar, dostarym bar. Qaıtse de aman qalýym kerek», dep ózimdi qaıraı tústim. Asaý tolqyndarmen tańǵy 4-ke deıin arpalystym. Qaıyǵym tik kóterilip, qaıtadan ornyna kelgende, kirgen sý jyp-jyly sııaqty kórinedi. Sol kezde rahattanyp, tátti uıqyǵa ketip bara jatqandaı kúı keshemin. Marqum apamnyń «Talant! Talant!» – degen daýysy qulaǵyma keledi de, esimdi bir sát jıǵandaı bolamyn. Aman qalýǵa áreket jasap, jantalasa bastaımyn. Jaǵaǵa taıap qalǵan bolýym kerek, adamdy kóteretindeı muzǵa tap boldym. Sonyń ústine shyǵyp, jaǵaǵa qaraı bettedim. Alystan atty kisini kórip, aıǵaılap edim, estimedi. Biraz jerde turǵan qystaýdy kózim shaldy. Birese eńbektep, birese tizerlep júrip, áıteýir, jettim-aý. Úıge kirgende, kózime birden orys apa tústi. Odan ári esimnen tanyp qalyppyn. Ol kisi meniń sý kıimderimdi sheship, orap-qymtap tósekke jatqyzyp qoıypty. Qansha uıyqtaǵanym belgisiz, dabyrlaǵan daýystardan oıandym. Meni izdep kelgen Qanat aǵam men jıen aǵam Dýlat eken. Artynan bilgenimdeı, Aqtúbekten aqqan bette 40 shaqyrym yǵyp, Tassaıdan ári 20 shaqyrym tustaǵy «Erkinbektiń shúmegi» degen jerde jaǵaǵa shyǵyppyn. Eger Natasha apa aldymnan shyqpaǵanda, aman qalýym ekitalaı eken, – deıdi aǵam. Asaý attyń qulaǵynda oınap, kókpar tartyp, sporttyń birneshe túrin serik etkeni de aǵamnyń aman qalýyna septigin tıgizgeni anyq. Shorǵa aýylynyń jurty túni boıy tileýin tilese, azamattary kúni-túni kóz ilmeı izdeýde júrdi. Bul aýyl adamdarynyń yntymaǵy jarasqan qaýym ekendigin kórsetti. Aıtpaqshy, aǵam Talant – Táýelsizdiktiń tól qurdasy. Elimiz egemendik alǵan jyly dúnıe esigin ashqany da beker emes-aý dep oılaımyn. Osyǵan oraı aǵamdy jáne onyń qurdastaryn – Táýelsizdik qurdastaryn uly merekelerimen quttyqtaǵym keledi.Táýelsizdiktiń jigerli de, júrekti azamattary kóp bolsyn! Lázzat QANATQYZY, Y.Altynsarın atyndaǵy orta mekteptiń 11-synyp oqýshysy Shyǵys Qazaqstan oblysy, Tarbaǵataı aýdany, Shorǵa eldi mekeni