Elızabet Tursynbaeva el chempıony atandy

Ońtústik astananyń «Almaty Arena» muz saraıynda mánerlep syrǵanaýdan  Qazaqstannyń ashyq chempıonaty óz máresine jetti. Ol  2017 jyly megapolıste ótetin qysqy Ýnıversıada qarsańynda uıymdastyrylǵan testilik jarys bolyp esepteldi. Sebebi,  mánerlep syrǵanaý stýdentter básekesi baǵdarlamasyna kiretin sport túri bolyp tabylady. Jarysqa Qazaqstan, О́zbekstan men Qyrǵyzstan elderiniń 80-ge jýyq sportshysy qatysty. Muz aıdynyna alǵashqy bolyp sport sheberligi­ne úmitker qyzdar shyqty. Olardyń arasynda almatylyq Alana Toqtarova 135,21 upaımen birinshi oryndy jeńip aldy. Ekinshi oryn 97,10 upaı jınaǵan kelesi almatylyq Gúljan Jumádilovaǵa buıyrdy. Úshinshi orynǵa  96,97 upaı jı­naǵan Ońtústik Qazaqstan oblysynyń sportshysy Darııa Sırotınaǵa tıesili boldy. Al uldar arasynda 124,59 upaıly astanalyq Rahat Biralın birinshi orynǵa kóterildi. Budan keıingi oryndarǵa alma­ty­lyq­tar Vsevolod Fıl (103,12) men Ilıýsı Volkov (94,85) ornalasty. Budan keıin jankúıerler sport sheber­leriniń erkin baǵdarlama boıynsha saıys­taryn tamashalady. Olardyń tobynda qyzylordalyq Elızabet Tursynbaevaǵa teń keler eshkim bolmady. Ol  216,46 upaı alyp, rekordtyq kórsetkishke jetti. Kelesi eki júldeli oryndarǵa qysqy Ýnıversıadaǵa qatysýshylar sapyndaǵy almatylyqtar Aıza Imanbek pen  Aleksandra Saıýtına jaıǵasty. Olar tıisinshe 135,11 jáne 123,41 upaı jınap, chempıonnan kóp qalyp qoıdy. – Búgingi nátıjeme óte rızamyn. Sebebi, upaıym qoryn jańartyp, osy jylǵy eń joǵary ball jınadym. Ýnıversıadada osy eki baǵdarlamamen óner kórsetsem degen oıdamyn. Biraq qosymsha ózgerister bolýy da múmkin. Sonyń bárine tııanaq­ty daıyndyq jasap júrmin. Bári sátti óte­tin shyǵar degen úmittemin, – dedi Aıza Imanbek jarys sońynda. Uldar arasynda bes sport sheberi ózara kúsh synasyp, nátıjesinde altyn medaldy 150,48 upaı jınaǵan  almatylyq Artýr Panıhın jeńip aldy. Qaraǵandylyq Melıs Hakımov (132,13) pen astanalyq Nıkıta Manko (129,92) budan keıingi eki júldeli oryndy enshiledi. Talǵat SÚIINBAI, «Egemen Qazaqstan» ALMATY