Frıstaıl – júrektiler sporty

Janbota Aldabergenova – frıstaıl­dyń akrobatıka túrinen iri jeńiske jetken tuńǵysh qazaq qyzy. Ony osy erek­sheligimen elimizdiń sport tarıhy­nyń bir altyn paraǵyna aınaldy desek ábden jarasady. Sochıde ótken Olımpııa oıyndarynda Janbota 6-orynǵa taban tiredi. Rasy kerek, áýedegi akrobatıkany buryn da kórip júrdik qoı. Biraq qysy qoıannyń quıryǵyndaı sholaq, qalyń qar kórpesin qymtap uzaq jata almaıtyn kún sáýleli ońtústik qyzynyń sekirý kezegi kelgende, ózimiz kádimgideı seskenip qalyp júrdik. Bıik tóbeden shańǵy ústinde jelmen jarysyp, quldılap kelip, qaıqańǵa ilikken soń ushqan qusqa uqsap aspanǵa qalyqtap ketesiń. Áýede eki-úsh márte aınalyp, tartylys zańymen jerge qaraı sorǵalaısyń. Aspannan aǵyndap kele jatyp, jerge jaqyndaǵanda, deneńniń ár gramm salmaǵyn eseptep úlgerip, qaqqan qazyqtaı tik túsý, tepe-teńdik buzbaı syrǵanaý kórer kózge ǵana ońaı. Sál qatelestiń, deneńe ıe bola almaı qaldyń, sporttyq kórsetkishińniń nátıjesi tómendegeni ber jaǵy, aýyr jaraqat alyp qalýyń op-ońaı. Qary joq ońtústiktiń qyzy osy kedergilerden aman ótti. Dúnıe júzi kóz tikken aq Olımpıadada jazynan qysy kóp, shańǵysyn baılap alyp kúnde jattyǵý alańynan shyqpaıtyndar kil myqtymen terezesi teń óner kórsetti. Janbota Aldabergenovamen Ońtústik Qazaqstandaǵy №8 qysqy sport mektebiniń dırektory Baqytjan Zııabekovtiń keńsesinde kezdestik. – Men qysqy sport mektebine 2011 jyly Azııa oıyndarynan keıin keldim, – deıdi Janbota. – Oǵan deıin bes jyl sporttyq gımnastıkamen aınalys­qan­myn. Nátıjesiz emespin, sport sheberi ataǵym bar. Sporttyq gımnastıkada básekel­es­tik kúshti, al meniń armanym qysqy Olım­pıada oıyndaryna qatysý bolat­yn. Onyń ústine, gımnastıka men frı­staıldaǵy akrobattyq ádister uqsas. Batýt­ta oryndap júrdik. Biraq shańǵy­ǵa al­ǵash turǵanda, kóńilime úlken qobaljý kirdi. О́zim 37-38 ólshemdi aıaq kıim kıemin, shańǵymen ólshegende, jarty metrdeı uzaryp ketkendeı boldy. Keıinirek bul janyma óte jaqyn sport túrine aınaldy. Qysta taýly adyrlardan bólek sý tramplıninde de jattyǵý ótkizemiz. – Arada jyl ótkende, Mınsk qala­synda Eýropa Kýbogynyń kezeńinde 3-oryn aldym, – dep jalǵady sózin Jan­bota. – 2013 jyly Eýropa Kýbogy­nyń 1-2 ke­zeńinde Shveısarııada 1-orynǵa ıe bol­dym. Elimizdiń oqýshylar arasynda ótken qysqy spartakıadasynda bas júlde buıyrdy. Aıtqandaı, frıstaıl-akrobatıkadan biz ǵana seskenemiz be desek, osy salanyń aqbereni Janbotanyń ózi ár jarys aldynda qatty qobaljıdy eken. Shyǵan­dap aspanǵa kóterilip ketesiń, ushqan kezde de áýedegi ádis pen jerge qatesiz qonǵan­ǵa da sheberlik, úlken ep kerek. «Keıde kezegiń kelgende, doly jel qutyryp ketedi, áýede qaqpaqylǵa aınaldyrǵysy keledi, baǵytyńa kedergi keltiredi, qatty qınala­syń. Múmkindiginshe qate jiber­meýge tyrysasyń. Sál múlt ketý ná­tı­jeńdi tómendetedi», – deıdi Janbota. Janbota úshin alda eki úlken jaýapty kezeń tur. Almatyda qysqy Ýnıversıada oıyndary ótse, Ońtústik Koreıada Azııa oıyndary ótpek. – Biz Janbota jáne bapkerlermen keńese otyryp, ózimizdegi Ýnıversıadaǵa qatysýdy jón kórdik, – deıdi Baqytjan Ordabekuly. – Azııa oıyndarynyń dárejesi bıik sııaqty kóringenimen, Otanymyzda ótetin Ýnıversıadanyń jaýapkershiligi úlken. Janbota Aldabergenova da osyndaı oıda. О́z eli, óz jerinde ótken Ýnıversıadada top jaryp, Qazaqstan baıraǵyn kóterip, ánuranyn oınatý keýdesindegi ádemi armany. Frıstaıl sportynan elimizdiń memlekettik jattyqtyrýshysy Qazbek Imanǵalı da «Janbota Aldabergenova keıingi kezderi óte joǵary jetistikterge jetip júr. Odan tek altyn kútemiz» dep otyr. Tuıǵyndaı qyz osy údeden shyǵýǵa baryn salyp jatyr. Baqtııar TAIJAN, «Egemen Qazaqstan» ShYMKENT