Ár oqýshy – bir álem

Zamanaýı baǵytta jumys isteý júıesi qalyptasqan bilim oshaqtarynyń arasynda Bıdaıyq orta mektebiniń orny bólek. Ujym bıyl «Úzdik mektep» atalymy boıynsha 17 mıllıon teńgeniń sertıfıkatyn jeńip aldy. Mundaı qurmet ustazdar qaýymy úshin zor mártebe ári zor jaýapkershilik júkteıdi. Elimiz egemendigin alǵannan bergi kezeńde bilim ordasy ýaqyt aǵymyna saı jańa kelbetin qalyptastyryp, oqý men tájirı­beni tereń ushtastyryp keledi. Ustazdar qaýymyna jańashyl­dyq qasıetter tán. Oqý kabınetteri qazirgi talaptarǵa saı jabdyq­talǵan. Pedagogtardyń kásibı damýy jete eskerilip, aqparat­tyq-kommýnıkasııalyq tehnologııalar oqý-tárbıe úderi­sine belsendi túrde engiziledi. Jańasha oqý, modýldik tehno­logııa, synı turǵydan oılaý, jobalaý tehnologııalary keńinen qol­danylady. Semınarlarda, pedagogıkalyq oqýlarda, sheberlik synyptarynda is-tájirıbeler jan-jaqty tanystyrylady. Bıdaıyq orta mektebi sońǵy úsh jylda úlken jetistikterge qol jetkizdi. 2013 jyly Ulttyq biryńǵaı testileýdiń nátı­jesi boıynsha oblystyń on úzdik mektebiniń qataryna endi. Kelesi jyly «Tıimdi aýyl mektebi» atty qashyqtyq baı­qaýy­nyń úshinshi dárejeli dıplomymen marapattaldy. On ustaz «Oqý úderisiniń ozyq ádisi – jappaı bilim berý sapasynyń negizi» atty synama jobaǵa qatysty. Qazaqstan Respýblıkasy Táýelsizdiginiń 25 jyl­dyǵyna arnalǵan «Seni jyrǵa qosamyn, týǵan ólkem!» aýdandyq kórkemónerpazdar baıqaýynda ujym bas júldege ıe boldy. Ár oqýshy – bir álem. Olardyń árqaısysyna jeke tulǵa retinde qarap, baǵalap, talantyn ashyp, ózine artylǵan júkti abyroı­men oryndap júrgen ustazdar az emes. Bastaýysh synyp muǵa­limi Úmitjan Nurǵazına respýblıkalyq saıysta «Úzdik sheberlik synyby» atalymyn jeńip aldy. Zúlfıra Tileýqa­bylova «Jyldyń úzdik pedagog-psıhology» atansa, tarıh páni­niń muǵalimi Dáýren Ysqaqov respýblıkalyq «Úzdik jas maman» baıqaýynyń jeńimpazy boldy. Ustaz aldynan tálim-tárbıe alyp, eńbegin aqtap, mekteptiń atyn shyǵaryp júrgen túlekterimiz kóp-aq. Mektebimizde respýblıkalyq «Zerde» ǵylymı jobalar baıqa­ýynyń aǵylshyn tili men matematıka pán­derinen ótken qashyqtyq olımpıadalarynyń jeńimpazdary oqıdy. Oqýshylardyń talantyn jan-jaqty ushtaıtyn «Erke qyz», «Úkili dombyra», «Jas talap», «Qol óneri» úıirmeleri jumys isteıdi. Oblystyq, aýdan­dyq sporttyq jarys­tarda mektep namysyn qorǵaıtyn oqýshy­larymyzdy dene tár­bıesi pániniń muǵalimderi Dýlat Muhame­dııarov pen Arman Shaısultanov shyńdaıdy. О́z isine árkez úlken jaýap­ker­­shilikpen qaraıtyn mundaı jas mamandarymyzdyń erteńi­nen mol úmit kútemiz. Ata-analar da urpaq tárbıesinen shet qalmaıdy. Aýyldyq bilim oshaqtary arasynda birinshi bolyp «Úzdik mektep» ataǵyn jeńip alýymyz biraz jaıtty ańǵartsa kerek. Munyń ózi ujymnyń qoıan-qoltyq atqarǵan jumysynyń jáne táýelsizdik jyldarynda aýyldyq mektepterge barlyq jaǵdaılardyń jasalýynyń nátıjesi dep bilemiz.  Raısa KÁRIMJANOVA, Bıdaıyq orta mektebiniń dırektory Soltústik Qazaqstan oblysy, Ýálıhanov aýdany