Temir jol ardagerlerine orden tapsyryldy

Keshe «Qazaqstan temir joly» ulttyq kompanııasy» aksıonerlik qoǵamynyń ákimshilik ǵımaratynda salanyń órkendeýine úles qosqan ardagerler mamandary men sheteldik áriptesterin saltanatty jaǵdaıda marapattady. Basqosýǵa Premer-Mınıstrdiń birinshi orynbasary Asqar Mamın qatysyp, sóz sóıledi. Ol elimizdegi temir jol salasynyń qarqyndy damýyn áńgimelep, temirjolshylardyń eńbegin erekshe atap ótti. «Qazaqstan Elbasy Nursultan Nazarbaevtyń tikeleı bastamasymen júzege asyrylǵan jobalardyń arqasynda turaqty ilgerileý ústinde. Biz qysqa merzimde mańyzy úlken tabystarǵa qol jetkizip, halyqaralyq arenada mártebemiz asqaqtady. Prezıdenttiń biregeı sheshimimen jańa álemdegi orny aıryqsha elordamyz – Astana salyndy. Bul qala – qazirgi tańda táýelsizdigimizdiń sımvoly. Egemendik alǵaly beri elimizge shet memleketterden tartylǵan ınves­tısııa kólemi 265 mıllıard dollardy qurady», degen Asqar Uzaqbaıuly elimizdiń eksporttyq jáne tranzıttik áleýeti damyp jatqanyn aıtty. Birinshi vıse-premerdiń sózine qaraǵanda, Elbasy bastamasymen kólik jáne logıstıka salasynda Qazaqstan jáne Eýrazııa kontınenti úshin tarıhı mańyzy bar jobalar qolǵa alynǵan. Saltanatty jıynda «Qazaqstan temir joly» UK» AQ basshysy Qanat Alpysbaev áriptesterin el Táýelsizdiginiń mereıtoıymen quttyqtady. Ol kompanııanyń jetistikterin sóz etip, egemendik alǵaly Qazaqstan ekonomıkasynyń qanat jaıýy­na serpin beretin irgeli isterdiń atqarylǵanyn áńgimeledi. Shara barysynda kópshilik Qazaqstan temir jolynyń tarıhyna arnalǵan derekti fılmdi kórip, kórkemónerpazdardyń konsertin tamashalady. Sodan keıin bir top temirjol salasynyń ardageri men sheteldik áriptesteri «Qurmet», «Parasat» jáne ekinshi dárejeli «Barys» ordenderimen marapattaldy. «Ekonomıkanyń kúretamyry sanalatyn temir jol lokomotıvinde on segiz jasymnan bas­tap qyzmet etip kelemin. Kóptegen jobalarǵa qatysyp, tamshydaı bolsa da úlesimdi qostym. Áriptesterimniń árqaısysynyń eńbegi ushan-teńiz. Sony elep-eskergen, yqylasyna bólegen basshylyqqa alǵysymyz sheksiz», dep aǵynan jaryldy Qazaqstan temir joly akademııasynyń rektory Baqytjan Qýanyshov. Ashat RAIQUL, «Egemen Qazaqstan»