Partııa uıymdarynyń úzdikteri ataldy

Keshe «Nur Otan» partııasynyń Ortalyq apparatynda «Nur Otan» partııasynyń úzdik qoǵamdyq qabyldaýy» respýblıkalyq baıqaýynyń jeńimpazdaryn marapattaý saltanaty ótti. Qoǵamdyq qabyldaýlardyń jumysyn yntalandyrý men jaqsartý maqsatynda 2010 jyldan beri «Nur Otan» partııasynyń úzdik qoǵamdyq qabyldaýy» respýblıkalyq baıqaýy jyl saıyn ótkizilip keledi. Tórt jyl qatarynan ótkizilgen baıqaýlar partııanyń qoǵamdyq qabyldaýynyń jumysyn jandandyrýda oń nátıjeler berdi. Al bıylǵy jyldyń basty ereksheligi men jańalyǵy óńirlerdiń jáne aımaq fılıaldarynyń «Úzdik qoǵamdyq qabyldaýy» baıqaýy «Úzdik depýtat», «Úzdik memlekettik organ» jáne «Úzdik qyzmetker» sııaqty jańa atalymdarmen tolyqty. Tıimdilik pen aryzdanýshylardyń máselelerin sheshýdegi qoǵamdyq qabyldaý jumystarynyń nátıjeliligi respýblıkalyq baıqaý jeńimpazdaryn anyqtaýdaǵy negizgi ólshem boldy. Baıqaýǵa usynylǵan materıaldar jan-jaqty jáne ádil qaralyp, sonyń negizinde partııanyń óńirlik jáne aımaqtyq fılıaldarynyń arasyndaǵy eń úzdik qoǵamdyq qabyldaýlar anyqtaldy. Baıqaý jeńimpazdary dıp­lomdarmen jáne baǵaly syılyqtarmen marapattaldy. Marapattalǵandardyń arasynda «Bilim» (Almaty oblysy), «Qazaqtelekom» (Qostanaı oblysy), «QazPlast» (Qaraǵandy oblysy), «Teplotranzıt» (Astana qalasy), «Birlik» (Atyraý oblysy) jáne basqa bastaýysh uıymdary bar. Al baıqaýdyń «Úzdik depýtat» atalymy boıynsha Májilis depýtattary Máýlen Áshimbaev pen Ersultan Bekturǵanov jeńimpaz dep tanyldy. Sondaı-aq, osy is-sharada «Nur Otan» partııasynyń 2017 jylǵy eń úzdik qoǵamdyq qabyldaýy» respýblıkalyq baıqaýy bastaý aldy. Sonymen qatar, eń úzdik bastaýysh partııa uıymdaryn anyqtaý jáne olardyń jumys isteý tájirıbesin taratý maqsatynda «Nur Otan» partııasy jyl qorytyndysynyń nátıjesi boıynsha úzdik bastaýysh partııa uıymynyń da (BPU) baıqaýyn ótkizdi. Baıqaý birneshe kezeńnen turdy, úzdikterdi respýblıkalyq komıssııanyń músheleri iriktedi. Baıqaý maqsaty – eń úzdik bastaýysh partııa uıymdaryn anyqtaý, olardyń jumys isteý tájirıbesin basqa óńirlerge taratý, olardy partııalyq jáne basqa da saılanbaly qyzmetke usyný úshin bastaýysh partııa uıymdaryndaǵy belsendi jáne kásibı sheberligi joǵary tóraǵalardan partııanyń kadrlaryn jasaqtaý. Sondaı-aq, BPU arasyndaǵy básekelestik rýhty qalyptastyrý, marapattaý men yntalandyrý jolymen BPU jumysynyń tıimdiligin arttyrý, jumys isteý tájirıbesimen bólisýdi qamtamasyz etý, el Táýelsizdiginiń 25 jyldyǵy qarsańyndaǵy qazaqstandyqtardyń ómir súrý sapasyn jaqsartýǵa baǵyttalǵan partııalyq mindetterdi iske asyrýdaǵy BPU úlesin belgileý-baıqaýdyń maqsaty bolyp tabylady. Konkýrs ashyq túrde ótkiziledi jáne úsh kezeńnen turady – óńirlik, aımaqtyq jáne ortalyq. Oǵan BPU-nyń úsh sanaty da qatysa alady. Ár sanat úshin úsh atalym boıynsha úsh júldeli oryn belgilengen. Dástúr bo­ıynsha úshinshi atalymdaǵy úshinshi oryndy eki bastaýysh partııa uıymy ózara bólisedi. Irikteýdegi ólshemderdiń ishinde partııalyq jobalardy iske asyrýǵa qatysý, ishki partııalyq jumystyń sapasy, jastarmen jumys isteýde jańa tásilderdi qoldaný jáne basqa da kórsetkishter bar. Baıqaýdyń barlyq kezeńderi bekitilgen baıqaý erejesine sáıkes ótkiziledi. Bastaýysh partııa uıymy partııanyń uıymdastyrýshylyq negizgi ózegi bolyp tabylady jáne mindetterdiń jergilikti jerlerde josparly júzege asýyna muryndyq bolady, óz músheleri arasyndaǵy aqparattyq-nasıhattyq, túsindirme jumystaryn iske asyrady, partııalyqtardyń jarǵylyq talaptardy múltiksiz oryndaýyn qamtamasyz etedi. Is-shara barysynda, sondaı-aq qoǵamdaǵy jemqorlyqqa qarsy mádenıetti qalyptastyrýǵa jáne arttyrýǵa baǵyttalǵan respýblıkalyq karıkatýra baıqaýynyń jeńimpazdary da marapattaldy. Belgili karıkatýrashy Aıdarbek Ǵazızuly osy baıqaý komıssııasynyń múshesi bolǵanyn atap ótken jón. Álısultan QULANBAI, «Egemen Qazaqstan»