Myqtylardyń ózin moıyndatqan

qazaq balalary Táýelsizdiktiń 25 jyldyǵyna keremet tartý jasady «Teginde, adam balasy adam balasynan aqyl, ǵylym, ar, minez degen nárselermen ozbaq. Onan basqa nársemenen ozdym ǵoı demektiń bári de – aqymaqtyq». Kóregen Abaı eldiń el bolýy úshin kerekti nárseni 2-aq sóılemge túıip aıtyp ketti. Abaı sózin uqqan ótken ǵasyrlardaǵy qara tanymaıtyn talaı qazaq balasy bilimge umtyldy. Sol ul-qyzdardyń arqasynda bizge táýelsizdiktiń de tańy sibirlegeni ótirik emes. Al erkindik keleshek urpaqqa úlken múmkindikterdiń esigin ashty. Bul múmkindikterdi múlt jibermeı kele jatqan qazaq balalary da joq emes. Kúni keshe mektep oqýshylary arasynda ınformatıkadan ótken «Búkilreseılik Komandalyq Olımpıadany» tuńǵysh ret qazaq balalary utyp aldy. Aty re­seı­lik bolǵanymen bul olımpıadany ashyq chempıonat dep aıtqan jón. TMD elderi boıynsha jarysqa jyl saıyn 200-den astam komanda qatysady. 2000 jyl­dan beri jarys 16 ret ótkizilse, so­nyń 12-sinde reseılik, 4-eýinde belorýs­tyq balalar jeńimpaz atanǵan eken. Qazaqstandyqtardyń eń joǵarǵy nátıjesi – 2013 jylǵy 6-oryn. Mundaı úlken dárejede ótetin ınformatıkalyq olımpıadada sátti óner kórsetkenderdiń bolashaqta Google, Facebook, Twitter syndy tanymal kompa­nııa­larda jumys jasaý múmkindikteri mol. Reseılik oqýshylardy stýdentter ara­syn­da jyl saıyn ótetin álem chempıo­na­tyn alma-kezek utyp júretin sol el ýnı­­­ver­sıtetteriniń muǵalimderi jattyq­tyra­dy. Alaıda, qansha myqty degenmen, reseı­­lik oqýshylar bıyl qazaqstandyq qura­maǵa jol berdi. Chempıondyq koman­da­­nyń qura­myn­da bolyp, altyn medal alýǵa atsa­lys­qandar: astanalyq qazaq-túrik lıseıi­niń oqý­shysy Sanjar Bıdaıbek jáne al­ma­ty­lyq qazaq-túrik lıseıiniń oqýshy­lary Ashat Jalǵasov pen Nurbaqyt Mádıbek. Bolashaqta IT salasyndaǵy álemniń kósh­basshy kompanııalarynda jumys jasaý­dy armandaıtyn bul balalar Táýel­siz­diktiń 25 jyldyǵyna keremet tartý jasa­dy dep nyq senimmen aıtýǵa bolady. Gúlzeınep SÁDIRQYZY, «Egemen Qazaqstan»