Sheteldik ınvestorlar Qazaqstanǵa orala bastady

Qazaqstan ekonomıkasyna jergilikti bıznesten góri, sheteldik ınvestorlar kóbirek senedi. Ústimizdegi  jyly elimizge kelgen sheteldik tikeleı ınvestısııa aǵyny artqan, dep habarlaıdy abctv.kz. Qańtar-shilde aralyǵynda Qazaqstan ekonomıkasyna quıylǵan  ınvestısııa ótken jylmen salystyrǵanda 23%-ǵa kóp. Jalpy alǵanda Qazaqstanǵa 9,3 mlrd dollar ınvestısııalanǵan. Qazaqstanǵa sheteldik ınvestısııanyń qaıta oralýy qazaqstandyq ınvestorlar óz qarajattaryn syrtqa áketip jatqan tusta oryn alyp otyr.  Ústimizdegi jyldyń 6 aıynda Qazaqstannan  tikeleı ınvestısııalardyń jalpy jylystaý kólemi 3 mlrd dollarǵa jýyqtady. Bul 2015 jyldyń sáıkes kezeńimen salystyrǵanda 2 ese kóp. Qazaqstandyq ınvestorlarǵa qysym ekonomıkadaǵy jaǵdaıǵa teris áser etti. 2015 jyldyń tórtinshi toqsanynyń ózinde elden baqandaı  5,2 mlrd dollar  ınvestısııa ketip qalǵan.  Investısııa ústimizdegi jyly da kete bastady, degenmen saıabyrsý bar. Sheteldik ınvestorlar Qazaqstan ekonomıkasyna qarjy quıýdy ótken jyly kúrt tııa qoıdy. Osylaısha olar teńge baǵamy qubylyp, Qazaqstandaǵy tólem balansy nasharlap,  elde ómir súrý deńgeıi,  kásiporyndardyń iskerlik belsendiligi tómendep turǵan shaqta áliptiń artyn baqqan. Jalpy 2015 jyly tutastaı alǵanda barlyǵy 15 mlrd dollar quıylǵan. Ol 2014 jylmen salystyrǵanda  38%-ǵa az. Degenmen, bıyl ekonomıka devalvasııalyq talyqsýlardan aıyǵyp, ósim kórsete bastady, jáne ınvestısııa aǵyny artyp otyr.