Búgin «Egemen Qazaqstan» gazetiniń redaksııasynda Táýelsizdiktiń 25 jyldyǵyna oraı ujym qyzmetkerlerine arnalǵan saltanatty shara ótti.
Gazet basshysy Darhan Qydyráli táýelsizdiktiń qundylyǵy týraly oılaryn aıta kele, basylymnyń órkendeýine úles qosyp kele jatqan gazet ujymyna alǵys bildirdi. Sonymen qatar basylymnyń bir top qyzmetkerin Qurmet gramotasymen jáne Alǵys hattarmen marapattady. Olardyń qatarynda gazettiń sholýshylary Jylqybaı Jaǵyparuly, Qarashash Toqsanbaı, Berik Sadyr, tilshi Joldybaı Bazar, sýretshi Aıdarbek Ǵazızov, fototilshi Orynbaı Balmurat jáne aǵa betteýshi Almas Manapov, operator Lázzat Nurpeıisova bar.
«Egemen» qyzmetkerleri qatarynan ardager jýrnalıst Súleımen Mámet keshe «Parasat» ordenimen marapattalǵan bolatyn. Burynyraqta aqparat salasyndaǵy úzdikterge beriletin «Nur Suńqar» júldesin gazettiń Jambyl oblysyndaǵy menshikti tilshisi Oralhan Dáýit jeńip alǵan-dy. Budan bólek birneshe jýrnalıst shyǵarmashylyq baıqaýlardyń júldegeri atandy.
Saltanatty shara sońynda gazet qyzmetkerleri ujym bolyp sýretke tústi.
