Almatydaǵy Ulttyq ulanda Táýelsizdiktiń 25 jyldyǵy atap ótildi

Almatyda Ulttyq ulannyń «Ońtústik» óńirlik qolbasshylyǵy El Táýelsizdigi kúnin atap ótti, dep habarlaıdy QazAqparat. Keń aýqymda ótken sharada «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Sabyrjan Súleımenov baıandama jasap, táýelsizdik jyldaryndaǵy Qazaqstan Respýblıkasynyń jáne Ulttyq ulannyń jetken jetistikterin aıtyp ótti. «Táýelsizdik bizdiń basty qundylyǵymyz, baǵa jetpes baılyǵymyz. Táýelsizdiktiń araıly tańy atqan shaqta áskerı qurylymdar arasynda alǵashqy bolyp Ishki ásker, qazirgishe Ulttyq ulan áskeri qurylyp, egemendi eldiń berik qorǵanyna aınaldy. Qazirgi ýaqytta ulandyq jaýyngerler beıbit kúnde de erlikke oryn baryn dáleldedi. Has jaýyngerler Erbol Otarbaev, Jandos Baıanbaev, Syrym Súndetov jáne kúni keshe ǵana Elbasynyń qolynan úshinshi dárejeli «Aıbyn» ordenin alǵan Bahtııar Qaıyrbekov, sonymen qatar «Halyq qaharmany» joǵarǵy memlekettik ataǵyna ıe bolǵan  polkovnık Qaırat Úmbetovtyń janqııarlyq erlikteri el esinde. Ulandyq jaýyngerler qashan jáne qaı kezde de bolsyn turaqtylyq pen tynyshtyq ornaǵan «Máńgilik eldiń» máńgilik qorǵaýshysy bola bermek», – dedi ol. «Ońtústik» óńirlik qolbasshylyǵynyń barlyq jeke quramy, Ulttyq ulan ardagerleri jáne áskerı qyzmetshilerdiń otbasy músheleri qatysqan is-shara barysynda jaýyngerlik qyzmet atqarýda úzdik qyrynan kózge túsken áskerı qyzmetshiler gramotalarmen, tós belgilermen jáne baǵaly syılyqtarmen marapattaldy. Áskerı qyzmetshilerge marapattardy «Ońtústik» óńirlik qolbasshylyǵynyń qolbasshysy general-maıor Álibek Serálıev tabys etti.