Almatydaǵy dzıýdo akademııasynda halyqaralyq dzıýdo federasııasynyń arnaıy ókiliniń qatysýymen jattyqtyrýshylarǵa arnalǵan semınar ótip jatyr. Semınarǵa elimizdiń túkpir-túkpirinen kelgen jattyqtyrýshylar qatysyp, biliktiligin shyńdaýda. Avstrııadan kelgen IJF ókiline shákirt bolyp júrgen jattyqtyrýshylarymyz semınardyń alǵashqy kúninde alǵan áserlerin jasyrmady. "Deńgeıi joǵary semınar jattyqtyrýshylardyń biliktiligin arttyryp qana qoımaı, elimizde dzıýdonyń damı túsýine súbeli úles qosady", - deıdi Mańǵystaý oblysynan kelgen bilikti bapker, Mańǵystaý oblysynda ornalasqan "Jastar" balalar-jasóspirimder sport mektebiniń dırektory.
Manarbek Bısekenov, jattyqtyrýshy (Mańǵystaý oblysy):
- Shet eldik mamannyń qatysýymen elimizde dzıýdodan jattyqtyrýshylarǵa arnalǵan mańyzy erekshe semınarǵa qatysyp jatqanyma qýanyshtymyn. Halyqaralyq dzıýdo federasııasynan arnaıy ókilderi kelip, elimizde dzıýdonyń damýyna úles qosyp jatqany, bizdi nazardan tys qaldyrmaǵany kóńil qýantady. Árıne, áýeli semınarǵa qatysyp, biliktiligimizdi arttyrýǵa múmkindik bergen federasııa basshylyǵyna alǵysymyzdy bildiremiz. Bul – mereke qarsańynda jattyqtyrýshylarǵa jasalǵan úlken syı.
Al Danı Djordjtiń bizge úıretip jatqan ádis-tásilderi bizge jat. Iаǵnı osy kúnge deıin biz qoldanbaǵan dúnıeni úırenip, dzıýdo tehnıkasynyń biz bilmeıtin qyrlarymen tanysýdamyz. Osy jerden úırengenderimizdi shákirtterimizge úıretip, biz jetpegen, biz baǵyndyrmaǵan belesti baǵyndyrýlaryna sebepshi bolsaq deımiz. Sondaı-aq, jaqynda dzıýdo erejelerine ózgerister engizilmek. Biz IJF ókiliniń arqasynda erejege engiziletin ózgeristermen tanysyp, praktıkalyq turǵyda daıyndalyp jatyrmyz. Semınar endi bastalǵandyqtan úırenerimiz áli de kóp dep oılaımyn, - dedi.
Esterińizge sala ketsek, jattyqtyrýshylarǵa arnalǵan tehnıkalyq semınar 14-19 jeltoqsan aralyǵynda Almaty qalasyndaǵy dzıýdo akademııasynda ótýde. Jattyqtyrýshylarǵa arnalǵan arnaıy tehnıkalyq semınar Halyqaralyq Olımpıada Komıtetiniń erejesine sáıkes Qazaqstan Ulttyq Olımpıada Komıteti men Qazaqstan Dzıýdo federasııasy uıymdastyrdy.
