25 medal ıesi

Búginde elimizdiń balalary memlekettiń qoldaýy arqasynda kóptegen jetistikterge jetip, keleshekte ózderiniń el úmitin aqtaıtyndaryn ańǵartyp júr. Qoǵamymyzda qalyptasqan izgilikti ortada emin-erkin ósip kele jatqan talapty, alǵyr mıllıondaǵan jas urpaqtyń aldaǵy ýaqytta ýaqyt talabyna saı óz qam-qareketi, óz úni bolatyny sózsiz. Qazirgi tańda talaıǵa úlgi bolýǵa laıyqty, kelesheginen úmit kúttirgen jetkinshekter óte kóp. Olardyń barlyǵyn qalaı maqtasaq ta jarasady. Solardyń arasynda Astananyń jas turǵyny, qazaqtyń qarapaıym balasy, túrli dodalarda top jaryp júrgen Almas Múbárakovtiń de bar ekenin aıtqymyz keledi. Búginde elordadaǵy Jambyl Jabaev atyndaǵy №4 mektep gım­nazııasynyń 5 «G» synybynda oqıtyn, 6 jasynan bastap karate sportymen shuǵyldanyp, dombyra tartyp, án shyrqaýda da eldiń yqylasyna bólene bilgen Almas Múbárakovtiń sporttaǵy, ónerdegi tabystary bir basyna jeterlik. Qarshadaı balanyń úlkendershe erkin sóıleýinen, oıyn irikpeı jetkize alatynynan onyń talaı dodaǵa qatysyp, shyńdalyp, ashyla túskeni anyq ańǵarylady. «Karateden Qazaqstannyń chempıonymyn, sondaı-aq, Asta­nanyń 4 dúrkin jeńimpazy atandym. Halyqaralyq týrnırlerdiń 2 márte kúmis júldegeri boldym. 2016 jyly sáýir aıynda Polshanyń Bydgosh qalasynda karate-dodan ótken VII álem chempıonatynyń qola júldegerimin. Qazirgi tańda barlyǵyn eseptegende 25 medal ıegerimin. Bul meniń el Táýel­sizdiginiń 25 jyldyǵyna qosqan ózindik úlesim dep bilemin!» – deıdi jas óskin. Almaspen sóılese kelip, onyń ónerge de qara jaıaý emestigin bildik. Ol «Sálem, Astana» respýb­lıkalyq konkýrsynyń, «Abyz dombyra» Astana qalalyq baıqaýy­nyń, Qazaqstan Táýelsizdiginiń 25 jyldyǵy aıasynda «Uly dala urpaǵy» taqyrybynda uıym­das­tyrylǵan, Mahambettiń jas ur­paqtaryna arnalǵan I respýb­lıkalyq baıqaýynyń júldegeri atanypty. Qazir Astanadaǵy №1 óner mektebiniń dombyramen án aıtý bóliminde óz talabyn ushtap júrgen Almas bıyl «Men qazaqtyń balasy» atty shyǵarmashylyq án keshin de uıymdastyryp úlgeripti. Ol óziniń bul keshin el Táýelsizdiginiń 25 jyldyǵyna arnaǵan eken. Mine, qar­shadaı Almastyń jetistigi osyndaı. Joldybaı BAZAR, «Egemen Qazaqstan»