Urpaqtar sabaqtastyǵy jalǵasa beredi

Ońtústik Qazaqstan oblysy boıynsha sottar ákimshisiniń basshysy Orynbasar Leshtaevtyń uıymdastyrýymen oblystyń sot júıesi ardagerleri, orta býyn jáne jas sýdıalar men memlekettik qyzmetke jańadan qabyldanǵan mamandardyń, Aýǵan soǵysy ardagerleriniń qatysýymen erekshe formattaǵy kezdesý ótti. – Taǵdyr talaıy únemi qyl ústinde bolǵan qazaq halqy tarıh­tyń talaı zobalańynan ótti, – dedi júzdesýde sóz alǵan O.Leshtaev. – Ata-baba ańsaǵan táýelsizdigimizdi aldyq. Memleket basshysy Nursultan Ábishuly Nazarbaevtyń syndarly saıasatynyń arqasynda álemge áıgili elge aınaldyq. Memlekettik «Máńgilik El» Patrıottyq aktisi arqyly dúnıe júzindegi eń damyǵan elderdiń qataryna qosylýdy maqsat tutqan halyqpyz. Elbasy bul bıikke búkil qazaqstandyqtardyń arqasynda jetkenimizdi únemi aıtyp keledi. Aǵa býyn ókilderin qurmetteý bizdiń basty paryzymyz. Qarııalarymyzdyń úlgisi men ónegesi tálim men tárbıeniń bastaýy dep bilemiz. Osyndaı kezdesýlerdi uıymdastyryp, ótkizip otyrý birlik pen urpaqtar sabaqtastyǵynyń sımvoly retinde mańyzdy. Sondyqtan, biz búgingi kezdesýge ardager sýdıalar men jas sýdıalardy, sot keńsesiniń orta býyn jáne keshe ǵana ant qabyldaǵan jas mamandardy ádeıi shaqyryp otyrmyz, – dedi ol. Osydan keıin qonaqtardy kezdesýdiń baǵdarlamasymen tanystyryp, onyń alǵashqy bóligine sáıkes ardagerler men sot keńsesiniń mamandary jańadan ashylǵan «Shymkent plaza» saýda ortalyǵyna ekskýrsııa jasady. Basqosýda Astana qalasynda ótken respýblıka sýdıalarynyń VII ceziniń delegaty, OQO kámeletke tolmaǵandardyń isteri boıynsha mamandandyrylǵan aýdan­aralyq sotynyń sýdıasy G.Sattarova Elbasynyń qaty­sýymen ótken sezden alǵan áserlerimen bólisti. Orda­basy aýdandyq sotynyń tóraǵasy, Aýǵan soǵysy ardageri Q.Musaev, Shymkent qalasynyń ál-Farabı aýdandyq sotynyń jas sýdıasy B.Qarabaev, sot júıesini ardageri L.Iýdına jáne orta býyn ókilderi H.Aldıkova, Á.Turǵynbekov ardager sýdıalarǵa densaýlyq, uzaq ómir tileı otyryp, merekemen quttyqtady. Baqtııar TAIJAN, «Egemen Qazaqstan» Ońtústik Qazaqstan oblysy