Antarktıdanyń bıik shyńynda – Qazaqstannyń memlekettik týy

16 jeltoqsan kúni barsha qazaqstandyqtarǵa arnap erekshe syı tartyldy. Elimizdiń tarıhynda alǵash ret, Qazaqstannyń Táýelsizdik kúni memlekettik týymyz Antarktıdanyń eń bıik núktesi – Vınson shyńyna (4892 m) ornatyldy. Polıarlyq ekspedısııaǵa qatysýshylar – belgili alpınıster Maǵjan Saǵymbaev pen Ilııas Ǵalymbekov aýa-raıynyń ózgeristerinen kestege engizilgen túzetýlerge qaramastan, Vınson shyńyna shapshań shyqty. Shyńdy alar aldynda, árbir kún sanaýly bolyp turǵan kezde, tuman men qardyń toqtaǵanyn alpınıster birneshe táýlik boıy tómengi lagerde kútip otyrdy. Qazaq Geography óńirlik ókildiginiń basshysy, ekspedısııa tobynyń jetekshisi Maǵjan Saǵymbaev bylaı deıdi: «Osy taýdyń basyna shyǵý úshin biz jarty jyl boıy sanaly túrde bar kúshimizdi salyp daıyndaldyq. Joǵary qaraı kóterińki kóńil-kúıde kóterildik. О́ziń úshin taýǵa shyqqanyń bir bólek, al eliń úshin jasaǵan áreketiń múlde basqa sezim týdyrady. Táýelsizdik kúni barsha qazaqstandyqtarǵa arnap osyndaı syı tartqanymyz úshin Ilııas pen ózimdi maqtan tutamyn». Ekspedısııaǵa qatysýshy Ilııas Ǵalymbekov «Aýa-raıy jaǵdaıyna baılanysty taýǵa shyǵý ońaı bolǵan joq. Qazir Vınson shyńynda turyp, bárine de tózip, sońyna deıin jete alǵanymyz úshin seriktesime jáne ózime rızamyn. Osy ýaqyt boıy bizdi qoldap kelgen barlyq adamdarǵa alǵysymdy bildiremin», deıdi. Esterińizge sala ketsek, ekspedısııa eki kezeńge bólingen. Búgingi tańda birinshi kezeń óz máresine jetti – bul Vınson shyńyna shyǵyp, týlardyń ornatylýy. Vınson shyńy óziniń geografııalyq ornalasýyna baılanysty «7 summits» alpınıstik baǵdarlamasynyń kúrdeli bıiktikteriniń biri bolyp sanalady. Osy jyly Vınsonǵa kóterilgen alǵashqy kúnnen beri 50 jyl toldy. Maǵjan Saǵymbaev pen Ilııas Ǵalymbekovtiń shyńdy sátti baǵyn­dyrǵandarynyń arqasynda Elbrýs pen Akonkagýa sekildi mándi órleýlerdiń qataryna Vınson da kirdi. Ekinshi kezeń birneshe kúnnen keıin bastalady. Atletter Maǵjan Saǵymbaev, Ilııas Ǵalymbekov, Iýrıı Iýshın, sonymen qatar, komandada dáriger mindetin atqaryp júrgen zertteýshi Dáýlet Sháripov Ońtústik polıýske qaraı shańǵy ekspedısııasymen júrip ótedi. Sportshylarǵa 217 shaqyrymǵa jedel marshty júrip ótýge týra keledi. «Qazaqstan ulttyq geografııalyq qoǵamy» RQB (QazaqGeography) basshylyq keńesiniń tóraǵasy, Nazarbaev Ýnıversıtettiń ǵylym men ınnovasııa­lar boıynsha vıse-prezıdenti Qanat Baıǵarınniń aıtýyn­sha, «Táýelsizdik Polıýsi» atty birneshe maǵy­nada biregeı bolyp sanalatyn ekspedısııany uıym­dastyrýshylardyń biri Qazaq Geography-dan shyqqan. Birinshiden, qatysýshylar qorshaǵan ortany lastaıtyn avtokólikpen emes, shańǵymen júrip ótkendikten, bul tolyqtaı ekologııalyq ekspedısııa bolyp eseptelinedi. Ekinshiden, ekspedısııa barysynda ǵalymdardyń jına­ǵan málimetteri polıarlyq zertteýler salasynda júr­giziletin ǵylymı jumystardyń nyq irgetasyna aınal­maq. Sonymen birge, Antarktıdada alǵashqy qazaq­standyq ǵylymı-zertteý beketiniń ashylýyna sebep bolatyn ekspedısııa Qazaqstanǵa kúshti áserin tıgizbek». Arnur ASQAR, «Egemen Qazaqstan»