Memlekettik bıýdjet kirisi 5,8 trln teńgeni qurady

Aǵymdaǵy jyldyń 11 aıynda memlekettik bıýdjetke 5,8 trln. kiris tústi. Bul týraly búgin Úkimet otyrysynda QR Qarjy mınıstri Baqyt Sultanov málimdedi. «11 aıdaǵy memlekettik bıýdjettiń atqarylýy bıýdjettiń barlyq deńgeılerindegi kirister ósiminiń joǵary qarqynymen belgilendi. Qazirdiń ózinde memlekettik bıýdjetke ótken jyldyń jyldyq kóleminiń deńgeıinde kirister tústi. Memlekettik bıýdjet shyǵystarynyń somasy ótken jyldyń osyndaı kezeńimen salystyrǵanda 1,5 trln. teńgege artyq tólendi. Qarjy mınıstrligi memlekettik organdarmen birlesip, aǵymdaǵy jyldyń qyrkúıek aıynan bastap naqtylanǵan bıýdjettiń is-sharalaryn oryndaý monıtorıngisi jumysyn atqardy. Apta saıyn bıýdjet qarajatyn ıgerý máseleleri jóninde memlekettik organdarmen selektorlyq keńester ótkizildi. Osy is-sharalardyń arqasynda ótken jyldyń kórsetkishterimen salystyrǵanda ıgerý qarqyny anaǵurlym jaqsy», - dep atap ótti mınıstr. Mınıstrdiń aıtýynsha, memlekettik bıýdjetke 5,8 trln. teńge kóleminde kiris (transfertterdi qospaǵanda) tústi. Memlekettik bıýdjet boıynsha asyra oryndaý somasy 396 mlrd. teńgeni, respýblıkalyq bıýdjet boıynsha 255 mlrd. teńgeni jáne jergilikti bıýdjet boıynsha 141 mlrd. teńgeni qurady. «Aǵymdaǵy jyldyń 11 aıynda ótken jyldyń dál osy kezeńine qaraǵanda memlekettik bıýdjettiń kiristeri 31,8 (1 398 mlrd. teńgege), respýblıkalyq bıýdjettiń kiristeri 41,1 (1 195 mlrd. teńgege) jáne jergilikti bıýdjettiń kiristeri 13,6 paıyzǵa (203 mlrd. teńgege) ósti. Tutastaı alǵanda memlekettik bıýdjettiń kiristeri 107,3, respýblıkalyq bıýdjettiki  106,6 jáne jergilikti bıýdjettiki 109,1 paıyzǵa atqaryldy», - dedi Sultanov.