Agrarlyq-ónerkásiptik keshen - ekonomıkalyq ósimniń qozǵaýshy kúshi

2016 jyly AО́K elimizdiń ekonomıkalyq ósiminiń qozǵaýshy kúshine aınaldy Buǵan elimizdiń aýyl sharýashylyǵyndaǵy oń kórsetkishter dálel bola alady. Bul týraly kezekti Úkimet otyrysynda aýyl sharýashylyǵy mınıstriniń birinshi orynbasary Qaırat Aıtýǵanov baıandady. "Mal sharýashylyǵy salasynda mal basynyń orta eseppen 1,3% artýy baıqaldy. Et óndirisi 3,5%, sút - 3,1%, jumyrtqa - 0,1% ósti. Jalpy astyq jınaý býnkerlik salmaǵynda 23,7 mln tonnany qurady, bul ótken jylǵydan 3 mln 900 myń tonnaǵa artyq. Ortasha astyq túsimi 15,4 s/ga qurady. Jınalǵan kólem eldiń ishki qajettiligin jáne eksporttyq áleýetti 8,5–9 mln tonna deńgeıinde tolyqtaı qamtamasyz etedi", - dedi agrarlyq vedomstvo basshysynyń birinshi orynbasary. Spıkerdiń aıtýynsha, Almaty, Jambyl, Ońtústik Qazaqstan oblystarynda 2,5 mln tonna kókónis, 1,7 mln tonna baqsha ónimi jınalǵan bul ótken jylǵy deńgeımen salystyrǵanda 439 myń tonnaǵa artyq. Ońtústik Qazaqstan jáne Almaty oblystarynda alma jınaý joǵary deńgeıde – sáıkesinshe 114 jáne 70 myń tonna boldy. 270 myń tonna maqta alyndy, bul ótken jylǵymen salystyrǵanda 3 esege artyq, túsim 24,6 s/ga. Jalpy 503 myń tonna kúrish jınaldy, túsimi 53,6 s/ga. Kúrishtiń rekordty túsimi - 55 s/ga jýyǵy Qyzylorda oblysynda jınaldy. Sonymen qatar sońǵy 20 jylda alǵash ret SQO-da qant qyzylshasy egilgenin aıta ketken jón. 14 myń tonna qyzylsha jınaldy, túsimi 350 s/ga. Bul ortasha respýblıkalyq kórsetkishten 15% artyq. Záıtún daqyldary boıynsha jalpy túsim 2 mln tonnany qurady, bul ótken jylmen salystyrǵanda bir jarym esege kóp. «Esepti kezeńde azyq-túlik ónimderin óndirý 3,8% artyp, 1,2 trln teńgeden asty. Jarma óndirý - 36%, qant - 49%, un - 13%, ósimdik maıyn óndirý - 14%, shujyq jáne sol sııaqty et ónimderin óndirý - 10% artty», – dep sózin qorytyndylady Q.Aıtýganov. Arnur Asqarov, "Egemen Qazaqstan".